مرکزی صفحہ / بلوچی / صغیرجان ءِ یات ءُ ترانگ

صغیرجان ءِ یات ءُ ترانگ

نبشتہ: حمیدہ بلوچ
سُچیت مات ءِ جگرکہ برات رؤت گُہارانی
اے یکے ءِ گپ اِنت کِسہ اِنت ھزارانی

صغیرجان ءِ ودی بوھگ ءَ چہ پَد من ھمےماراِت صغیر چہ مات ءِ دُرستیں زَھگاں چےشرنگ تِراِنت صغیر کسانی ءَ باز بیمار بوتگ ءُ نِزرکنگ ہم بوتگ پدا دیم ءَآپینڈکس ءَ گپت گُڈا پِت ءَ کراچی ءَ بُرت پہ اِلاج ءَ اود ءَ آپریشن بوت اے وھدا مات ءَ بےھَد درد ءُ رنج پہ صغیر ءَ سَگ اِتگ ءُ مات ءَ ہمےگُشتگ کہ من صغیر بہا زُرتگ بَزاں اِنچو مُسیبت ءَ چہ سلامت بیتگ انگت چو چِراگ ءَ منی دیم ءَ روک اِنت منی زانگ ءَ صغیر ششُمی تبک ءَ وانگ ءَ اَت پِت ءَ پہ صغیریک ٹانگو سائیکل ءِ گپت صغیر ہرروچ گوں سائیکل ءَ دست گٹ اَت یک روچےاناگت ءَ کپت ءُ دست ئےپُرشت گُڈا یکبرئےپدا پِت ءَ بُرت کوئٹہ ءَ پہ اَلاج ءَ
صغیرہپتمُی تبک ءَ وانگ ءَ اَت پِت ءَ را یک موتِرئے است اَت صغیر پِت ءِ موتِرئے نہ زُرت ءُ نہ چلاہینت ئے کہ پِت منا ھبرکنت وھدے گِس ءَ ساڑی نہ اَت یا واب اَت صغیر ھمئےدمان ءَ موتِرے زُرت ءُ چلاہینت ئے بلےمات ءَ گُشتے کہ پِت ءَ ھال مَدے منا ھبردنت گُڈا ھمئےداب ءَ یک رَندے پدا چہ موتر ءَ کپت سر ءُ پادئے ٹپی بوتاں پدا ڈاکٹرانی گورا شُتیں پہ اِلاج ءَ
صغیر ءِ ناکو ءَ را گاڑی ءِ اَست اَت کہ ٹیل ءِ کار ءُ بار ءِ کُت گُڈا ناکو گوں گاڑی ءَ گِس ءَ اَتک صغیرناکوئے کَرا اَت ٹیل ءِ ایرکُتاں گوں ءُ یک روچےناکو ءَ گُشت گاڑی ٹیر ءِ چیرئےسِنگ ءَ دُورکن صغیر سِنگ ءَ دُورکنگ ءَ اَت گاڑی ناکو ءَ دیم ءَ آؤرت صغیردست لگت بوت۔
منا ھوش اِنت کہ من ءُ صغیر یکجاہ وانگ ءَ شُتاں اِسکول ءَ پدا ھُوری ءَ اَتکاں گِس ءَ لیب ءُ گوازی کُت، من ءُ صغیر ءَ جنگ کُت برے برےزَھربوتاں پدا مُدتے ءَ پد وشان بوتاں۔ منی پِت ءَ برے وڈے ءَ کارکُتگ برے ڈرائیوربوت ءَ برے دان دُرشیں مشین ے ءَ کارےکُتگ برے زَمین داری ءِ کُتگ مارا لاپ داتگ ئے پہ بزگی اےگُشتگ ئے کہ من ھروڈا بِباں شُمار ءَ وانین آں پدا باندا شُما منا آسودگ کنے۔
2009 ءَ ہشتُمی تبک ءَ آواران تیرتیج ماڈل آئی ءَ اِسکول ءَ پاس کُت پدا گیشتِریں وانگ ءُ زانگ ءِ ھاترا شال ءَ دیم دات اود ءَ خضدار ءُ مستونگ کالج ءِ ٹیسٹ ئےتیاری کُت ئے ءُ ٹیسٹ ءَ پاس بوت خضدارکالج ءَ شُت پہ وانگ ءَ 2011ئےوھداَت وھدے چہ کالج ءَ موکل ءِ رَست ءُ گِس ءَ اَتک ما گَل بوتاں کہ مئےبرات اَتکگ مات ءُ پِت گَل بوتاں کہ مئےزَھگ اَتکگ من صغیر ءَ گُشت کہ تو اِدا مبئے منا ہچ وش نبیت توکہ گِس ءَ بئے اَنچوگُشئےکہ آزمان ءِ ماھ منی دیم ءَ بلگ ءَ انت۔صغیر جان ءَ منا ہم مدام گُشتے ھمیدہ تو ھم بوان گوں کہ دیم ءَ پِت ءَ من ءُ تو آسودگ کناں۔
خضدارکالج ءَ چہ پد کراچی ءَ اَتک لہتیں وھد ءَ اِنگلش زُبان ونت پدا 2016 ءَ کراچی یونیورسٹی ءَ پولیٹیکل سائنس ءَ داخل ءَ رَستے ما دُرس گَل ءُ شادان بوتیں کہ صغیرجان یک شریں مکتبے ءَ وانگ ءَ اِنت صغیر ءَ منا اے گپ گُشت کہ من نوں شَریں مکتبے ءَ وانگ ءَ اوں وانگ ءَ پارگ بین پدا لیکچرار ئے باں۔
اپریل ءِ ماہ ءَ بزاں کَراّ 2016 ءَ منا گُشت ئے کہ ھمیدہ توہم بیا کراچی ءَ بوان من ءُ تو ہم کوپگ باں پِت ءُ مات ءَ آسودگ کناں صغیر ءَ وانگ ءِ شوک سک بوتگ آئی دِل ءِ واھگ بوتگ کہ من بواناں بلے 20نومبر بِزاں تومشان ءِ ماہ ءَ 2017 ءَ کراچی یونیورسٹی ءَ چہ ناشناسیں مردمانی نیمگہ چے آوار جنئگ بیت۔ وھدےکہ مارا صغیرجان ءِ بیگواھ کنگ ءِ ھال سربیت گُڈا پّمن اے جلوائیں روچ، اے روکیں ماہ ءُ اِستال چو روکیں اِشکرا بنت۔روچ وتی برانز ءَ گلزمین ءَ تالان کنت گڈا صغیرجان ءِ ترانگ منا داگ دینت۔صغیر ءِ مہروانی،بچکند، وشیں کندگ، شیرکنیں گپ ءُ تران، نند ءُ نیاد اے دِلءَ چو بشانگی دارے ءَ کَل اَنت۔ ھمےدَمان ءَ کہ اے لَبزاں پہ صغیرمن نِبشتہ کنگ ءَ اوں منی چمانی اَرس چو تچوکیں آپ ءَ روان اَنت چو سارتیں نود ءَ شلان اَنت، من نزانتگ صغیر تی یات چو جمبر ءَ ساچان بنت ءُ من نِندان ءُ تی یاتاں نبشتہ کناں۔صغیر جان تی دُوری ءِ گم منا ھُشک ءَ نِندگ ءَ نیلنت۔
صغیرجان یک کندیل ءِ بوتگ کہ ھروھد ءَ لوگ ءَ بلگ ءَ بوتگ ءُ لوگ ءَ رُژن ئےتالان کُتگ ءُ تہاری ءِ گار ءُ گُمسارکُتگ گوں وتئ مہروانیں گپ ءُ بِچکندگاں بلے من نوں گوں کئے ءَ نِنداں مجلِس کناں۔
صغیرجان تی مات ھمائیں روچگ اِنت شپ ءُ روچ دُعالوٹگ ءَ انت کہ اللہ صغیرجان ءَ زوت واتِربیار۔ وھدے لوگ ءِ گیٹ ءِ آوازکئیت مات تچان ءَ رؤت پچ کنت ئے کہ تی ھال یکے ءَ راگون اِنت اگاں کس ئے پون کنت گوانکو ءَ تی مات چِست کنت ئے کہ بلکیں تی واتِربوھگےمِستاگ ءَ یکےچہ منا لوٹیت بلےاَنگت ءَ ہچ نہ اِش کُتگ۔انچو گشے
دِیدگاں بس تہاری اِنت ہچ میم بوھگ ءِ وڈ ءُ ڈول ءَ نہ انت
باریں کَدی آ روچ کئیت کہ مئےدیم ءَ تو چو سالونک ءَ نِندوک بئے بلئےاَرمان کہ اے میر ءُ واجہ پہ مئےھاتِرا چو گُنگدام ءَ گِندگ بنت ءُ اے جہان گُشےکَر ءُ کوراِنت کہ ہِچ نہ اُش کنت ءُ ہچ نہ گِندیت۔
آکر صغیر ءِ چےمیاراِنت کہ ہچ ھال ئے نیست کہ کُجا اِنت ءُ کُجا نہ اِنت آئی ءِ گُناہ ہمیش اِنت کہ یک ویرانیں ھنکینے ءَ بِزاں چہ آواران تیرتیج ءَ ودی بوتگ آ را پمشکہ بُرتگ مرچی تہاریں کوٹی ءَ بند ءُ جیل کُتگ
صغیرجان تو سرپدے
من ءُ تی مات پہ تو ھمئے وڈ تَلوسگ ءَ آں اَنچو کہ شائر اے شعر ءِ تہاگُشیت
تو کہ دُورے منی چِراگ تی گَم
روچے رَھمان ءَ بالگ ءَ اِنت من ءَ
————-
منی مِہرانی چِراگ گاریں
شُما کَس ءَ ندیستگ باریں

Facebook Comments
(Visited 32 times, 1 visits today)

متعلق بلوچی

بلوچی