مرکزی صفحہ / براہوئی / 10 فروری زند نا پوسکنا چوٹی راستیک

10 فروری زند نا پوسکنا چوٹی راستیک

آہ….. عبداللہ قہار
نوشتہ: انجم براہوئی
ای تکّاسٹ کہ 10فروری برو تو ای تینا خن تے بارن مننگ آ مجبور کروٹ. اونا یاداتے کلے مچ کرسا اسہ پلّوا تفوٹ و اونا ہمت, بہادری, جیرت او مر ہُننگے تینا صلاح جوڑ کرسا 10 فروری آ اسہ پوسکو کُلَوّ سے نا دروشم اٹ دنیا ٹی گام تخوٹ. مچا دے صبر نا کوشش اٹ تدیفنگ آن پد آخر است خوڑت مرسا خنتا باسکے مون شوہ کن ملا ہرا اسہ چولی تون کنا ہمت و بہادری نا قصہ ئے پش پش کرسا مون نا تلاراٹ ریڑ ترسا مِش تا باہوٹ کرے.
ای اینو نا دے ئے تین کن پدا ساہ ہلنگ نا دے پاوہ. داراست اے کہ کنا خنک داسہ ہم پالن او, کنا است سال سے آن پد ہم بھاز خوڑت اے, کنا قلم اینو ہم لکھنگ آن بِرّے, کنا بے واکی نا سیلہ داسکان 10فروری 2017 نا سوا 9 آ اڑینگوک اے ولے…… ولے کنا سنگت آتا جوزہ پوسکن اے, تازہ دم اے. ای و کنا سنگتاک اینو تینا دروآن جوان سوچنگ نا لائخ جوڑ ان. درو نن بیرہ تینا زبان کن سوچانہ ولے قہار ننے سوچنگ او گھڑتی نا اسہ پوسکنو لیک ئس تس ہنا, دا لیک انسانیت کن گھڑتی نا لیک اے. اسہ راجی او بندغ سے نا شہادت راج نا خیر خواہی نا کلو تف تو پین انت ایتہ؟ قہار راج نا دڑد کنوک اس و اونا پاکنگا دترک راجی او شعور سے نا کلو ترسا ڈغارا ڈیر مسر.

دا چائسا ہم کہ ننا قہار داسہ پدا بفک ولے ای او کنا سنگت آک شہید قہار ٹرسٹ نا پنٹ ایلو عبداللہ تے بچفنگ نا گھڑتی ٹی آختہ ان. راج نا عبداللہ تا گھڑتی, ننا و نما عبداللہ تا گھڑتی ننا گھڑتی جوڑ مسنے. او تانکہ ساہ ارے دا گھڑتی ننا سوچا تا بشخ مرو.
داکان مست نن تینا بشخ نا کاریم بیرہ زبان و ادب ئے تکاسن. زبان و ادب آن بنا نن تینے پین ہچو ذمہ واری سے نا شاید لائخ ہم تکنگ کتونہ ولے اینو نن بندغی نا خیر نا جوزہ تون زندہ ان. بلوچستان نا کنڈ کنڈ ٹی مروکا ایکسیڈنٹ او گاڈی تا ٹکر لگنگ آ قہار ٹرسٹ نا باسک آتا است سُرک. چنکو بھلو خبرسے آ دتر لہر کیک. ایکسیڈنٹ سے نا بننگ تون است باٹی بریک. ہر ایکسیڈنٹ قہار ٹرسٹ نا باسکا تیکن عبداللہ قہارنا دتر تے پوسکن کرسا بیرہ دا آخا کہ اونا یادے پوسکن کیک ولے تینا مشن تون پین سوگوی بشخک.

دا ہیتے نن ہم جوان چانہ کہ روڈ ایکسیڈنٹ آک ننا چنکا تواراٹ شاید توننگ مفس ولے شعور تالان کننگ ہم اسہ کاریمس ارے. ہرادے نن مدام تینا فرض پہہ مرسا تالان کرسا کرون. شہید قہار ٹرسٹ نا کاریم ننا بشخ نا کاریم اے… نما بشخ نا ہم کاریم اے. نم اگہ تینا بشخ نا کاریمے تینٹ کننگ کپیرے تو کم آن کم داخس تو کبو کہ راج نا اسہ بشخ سے ٹی کس نما بشخ نا کاریمے کننگ ٹی مرے تو اونا است بڑزائی اے ضرور کبو. عبداللہ قہار پدا بفک ولے ایلو عبداللہ تے پُلوکا کسر گڑاس آخہ گڑاس توننگ تو مریک. ببو ننا توار نا است بڑزائی ئے کبو کہ نن تینا بشخ تو اوار اوار نما بشخ نا کاریمے ہم کننگ ٹی ان. جزاک اللہ.
شہید عبداللہ قہار ٹرسٹ بلوچستان…

Facebook Comments
(Visited 12 times, 1 visits today)

متعلق براہوی حال حوال

براہوی حال حوال