فرشتہ۔۔۔

براہوئی افسانہ
نوشتہ : یارجان زیبؔ
رشید نا باوہ او رشید نا باوہ۔۔۔!!!
رشید نا لمہ خانہ نیک بننگ اُٹ صبر کر داخہ اشتافی اُس خیر ءِ۔۔۔؟؟
رشید نا باوہ اینو نُت آک ہم ختم مسُر ایلو کل گِڑاک تو وختی ختم مسُّوسر۔ہراوخت اسکا داحال مروئے؟
رشید نا لمہ !فکر کپہ اللہ جان کل ءِ جوان کیک ای منہ بندغاتون ہیت کرینُٹ اینو کاوا انشاء اللہ گڑاس مریک۔
رشید نا باوہ رشید نا اسکو ل نا فیس ہم سلوکے او مسڑ نا برام ہم کاٹماٹے امر مروئے؟
او خانہ نیک مرے داسکا ای زندہ اُٹ غم کپہ ۔
رشید نا باوہ مجید ءِ اِرا تو مست اونا کاریم آن کشنگاس دا پاریسہ کہ داسہ دا کمپنی ءِ بھاز نقصان مسونے او پیسہ نا ویل ءِ دا سوب آن نن نمے تنخواہ تننگ کپنہ نم داساداکا فارغ اُرے۔
اِراتو آن اُرانا سودا وام ٹی دو بریسہ کریکا دروآن او ہم دوکشار ۔داسہ بیرہ دیرآ گزارا اس۔
مجید اُراغان روزگار ئسے کِن اسے اُمید ئسے تو پیش تما،گلی آن پیشن مننگ تون دکان والا نا توار بس ماما مجید اِرا تو ءَنا وام تے ہراتم ایتوس؟
بس منہ دے ٹی ایتیوہ تا خواجہ فکرکپہ۔۔۔
مجید بازار نا کنڈا رائی مس کہ گڑاس کاریم ملے کہ چناتے کِن شام نا اِرغ نا بندوبست مرے۔مجید نا سنگت سلیم ہرانا بازار ٹی پرچون نا باز بھلو دکان ئس اسکا۔منہ سال مست ہراتم سلیم نا دوتنگ ئس تو مجید اونا کمک ءِ کریسُس او مجید ءِ اُمید ئس کہ سلیم اسہ نا اسہ وڑئس کروئے۔
ولے دکان نا مونا مجید ءِ خننگ تون سلیم مجید ءِ خنا او تینا مزور ئسے پارے کہ کس بس تو پاتہ مالک داڑے اف۔مزورہم ہندن کرے۔
مجید داکا نا اُمید مرسہ رائی مس۔۔۔
مجید جوان سرپند مس کہ مشکل نا وخت آ کس کاریم بفک بیرہ پیسہ کل ءِ سنگت کیک۔خنک غلغلو اسُر او چناتا خیال ہم اس۔
مچادے باسنا دے آکاریم کِن خوار مننگ آن گُڈ مجید شام تو اُراغا سر مس۔
تورشید نا لمہ سوج کرے رشید نا باوہ انت مس؟اینو رشید ءِ ہم سکول آن کشار کہ فیس ءِ ایت گڑا اسکول آ برک۔
مجید نا چپی ءِ خنیسہ او چُپ چُپ کمرہ ٹی ہنا۔
مجید تینا بدن نا تیٹی مش مریسہ ہناکا اسہ کنڈآن اُرانا غم تو ایلو کنڈان غم وام دار تا ہرا ہردے سوج کریرہ انت مس پیسہ تا ننا۔
تہٹی ختم مریسہ او سوچ ٹی اختہ ئس نن نا دوانزدہ بجہ نا وپاس آ مجید حویلی نا نیامٹ ٹی کَٹ آ تولوک بینگن او ملاس سوچ آتا جہانٹ تینے بددعا کننگ ئس ہنداڑ تون دروازہ نا توار مس۔اوہِنا تو خنِک کہ گیٹ نا مونا نُت،بورہ اواُرانا ایلو سامانک تخوکو داگڑاتون اسہ چٹی او گڑاس پیسہ ہم تخوک او۔
رشید نا لمہ زو بر۔او گڑا تے اُراٹی ایسُر۔
چٹی ءِ ملا تو اوٹی نوشتہ ئس کہ کنا ایلمی دادے کہ اینو اگہ ای نا کمک ءِ کرینٹ تو دا نا وجہ دادے کہ اسے وخت ئس کنے آ دا دیک تدینو کنے دردءَنا احساس ءِ۔خلق ءَنا دے ٹک نا کنڈا ئسے کارخانہ اسے نا کاریم نا بنا مسونے اوٹی کارندہ وپوریاگر درکار ءِ نم ہنبو نمے کاریم دو بروئے
انشاء اللہ۔چٹی ٹی کس نا پن الو،ولے اسے خاہوت ئسے کِن او فرشتہ اس اسک ہراڑکن ہمو اُراغان دعاتا ٹیکی ہر نماز اَٹ رائی مسکہ:

Facebook Comments
(Visited 16 times, 1 visits today)

متعلق براہوی حال حوال

براہوی حال حوال