مرکزی صفحہ / براہوئی / ننے ٹی اوفتے ٹی فرق

ننے ٹی اوفتے ٹی فرق

نوشتہ:انجم براہوئی
مالو ای ہم ہندن سوچاٹہ ہمر کہ ایلوک پارہ. ننے میڈیا کوریج تفک. ننا ہیتے کس بنپک. ننا واری آ کلے دوشہ گند کشک. ولے مدان مدانا کنا سوچنگ نا وڑ بدل مرسا کرے. انتئے بدل مف کہ ای خنوہ اوفتا زینب ہرفنگک او بش مریرہ, کل اسہ توار مرسا سڑک آبریرہ. تھانہ او تحصیل آ مچ مریرہ. اوفتا زینب نا لاش ملک اوفک گنوک مریرہ پنچ پنچ دے مچا زندنا سیبو تے بند کیرہ. تینا توارے بڑز کیرہ. اوفتا لیڈر او کماش اوفتا مخ تفی اے کیک. جنازہ ٹی اوار مریک. سڑک آک بند مریرہ. گڑا میڈیا مجبور مریک اوفتا پلوے ہلیک. اوفتے تون ہم توار مریک. بلکہ اوفتا تواران تینا ریٹنگ اے بڑزا کیک. اوفتا ہر چنکا بھلا ویلا اوفتا اسٹی پاش مریک. اوفک مچ مریرہ داہننگ آن بیدس کہ دنا نقصان مسنے. دیر خلکنے دیر خلنگانے. تینا غم اے اسٹ پہہ مریرہ. تینا ویلے ویل اس تکسا توار بڑز کیرہ. ولے نن…
ننا کس ہرفنگک ننے سما مفک.. ننا کس خلنگک نن خاچوک مرینہ. ننا کس بٹنگک نن تنگان مرینہ. نن توار بڑز کننگ آن خلینہ. نن تینا واری آ تینٹ گھٹو مرینہ. تینا جند کن ہیت کننگ آ ننا ساہ پیشن مریک. تین کن اراغان پیشن گام اس ہرفنگا نن منڈ او ٹنٹ مرینہ. تینا ویل اے پاننگ آ ننے مرگیک ہلیرہ. اسٹی نا توارا ننے بادلغام خلیک. ننا سماجی, سیاسی ورنا تنظیم, ادبی ادارہ, سیاسی او مذہبی پارٹیک کل ننا واری آ گنگ او منڈ مریرہ. کنے پابو کہ ادرنگ خلوکا وجود کن دیر بش مریک. اوڑکن دیر تینے ذلیل او رسوا کیک. خاچوک آ قوم آتا خاچنگ آن میڈیا نا ریٹنگ امر ودنگ کرو کہ او نا اوکنا توارے بڑزا کے.
دے ٹی اٹ واقعہ مریرہ. اٹ ویل باپٹرہ. اٹ بندغ موت نا گواچی مریرہ. اخس نا انصافی تا داستانک رقم مریرہ. ہموڑے نن او ننا راجی ادارہ غاک اخس تینے تکلیف کینہ. تینا حق کن بش مرینہ. تین تون مروکا جبرا ہیت کینہ. کپنہ…. کپنہ تو میڈیا نا انت کاٹم نا خل” کہ او ننا ہیتے کے.
درو طیبہ نا لاش کلی اسماعیل آن خننگا. اونا لٹوک آ پین کس آخا اونا ایلم اس. نن بش مسن… جی آخا… ملخدو بے گناہ کسے اونا اراغان ہرفنگا دننگا… دیر درے انتئے درے… نن ہیت کرین… کو ملخدو کسے نا مچا خاہوتے یرغمال کننگا نائب نا کوٹ او کاٹ ٹی تفننگا.. نن بش مسن… اودے تینا ویل چائسن…. آخا….. سال تا آخا صدی تا سے کہ نن ویلا تا گواچی ان.. ہڑدے ہوغوئی تمک.. ہڑدے ماتن کروئی تمک.. ہڑڈے کھونٹ شاغنہ او چھنڈنہ انت مگہ ہیت کینہ… کپنہ…. اسہ دے ننا سماجی او سیاسی ادارہ غاک ننا کسے نا ویلا بنا لالچ آن بیرہ انسانی یا قومی جوزہ نا خاطران بش مسر, پریس کلب سے نا مونا مچ مسر, قومی ویل سے آ بنا سیاسی سیالی آن نن تینا راست او جائز او حق سے کن اسٹ مرسا اسہ چوک سے آ مچ مسن. میڈیا اے مجبور کرین کہ او داپائہ کہ دا قوم یا داراج نا پیر ورنا, چنا نیاڑی, لیڈر پیہن ریشی, ملا او آمین پنچ دے نا سے اسہ توار مرسا تینا راستو ہیت یا حقیقی او حق سے کن اسہ جا تولوک او!!! آخہ…..
تو انت کن ایلو تا اواری آ دو ارفنہ.. انت کن ایلوتے شیف خلینہ. ننا راجی اوڑدہی ارانگ اے. ننا اسٹی نا نشان انت اے. بیرہ دادے کہ نن ایلو تا اواری, توار بڑزکننگ او ویلاتے آ اسٹ مننگ آ ہیت کینہ. تنقید کینہ ولے تینٹ اسٹی او اواری نا پن آن خلینہ.
نن پانہ کینسر آن کہسا کین ولے ہیت کروفن. پانہ روڑ ایکسیڈنٹ آتا سوب آن دے نا 20 لاش بھڈ کین کھڈ کین ولے روڑ خواہنگ کن بائے ملپرون. پانہ دے نا جتا جتا جاگہ غاتے آن ننا پنجاہ بندغ بے گواہ مریر ولے با نا منگ آتے کشپرون. پانہ ہڑدے ننا زینب آتے ہرفنگہ, دننگہ, ظلم نا گواچی کننگہ او اوفتا لوچنگا لاش تے ننا اراتا مونا بٹنگہ ولے نن کچوف ان کہ ننے اسٹی او اواری نا پز تننگ تنے. اگہ ننے گڑاس میراث ٹی ملانے اودادے کہ نن تیناہر ویلا تولن چپ کین او ایلو تا بش مروکا توارا تنقید کین. شہزاد غنی نا ہیت آن بار
” منزل ئے پٹسا ہوغسا کاسہ نی”
"داوڑ اٹ مشکل اے ملہ نے زندگی.”

Facebook Comments
(Visited 53 times, 1 visits today)

متعلق براہوی حال حوال

براہوی حال حوال