مرکزی صفحہ / بلوچی / منی استاد ءُ رھشون : صبا دشتیاری

منی استاد ءُ رھشون : صبا دشتیاری

ذوالفقار علی زلفی

مرک ھرچ ساہ دار ءِ مدیمی ھمراہ انت….زانگ نہ بیت کئے , کدی ءُ چون مرک ءِ بے مڑاھیں دپ ءِ وراک بیت….چوں کہ انسان چاگردی جناور انت , پگر ءُ سسا ءِ ھدا بند انت پمشکا مرک ءِ بزانت ءَ چہ ایدگہ ساہ دراں سرپد تر انت…. ھرچ انسان ءِ واھشت انت آ زندگ ببیت , بمانیت بلے اے آسراتی ھرکس ءَ نہ رسیت چیاکہ زندگ بوگ ءِ واستہ "زند” ءَ زانگ ھژدری انت ءُ زند ءَ ھرکس زانت نہ کنت… لہتیں مردم بنت , لہتیں کہ زاننت زند چی انت , مرک چی انت , زند ءِ لوٹ چی اَنت ءُ زندگ بوگ ءِ ھاترا مرک پرچا زلوری انت….اے زانوگرانی تہا یکے صبا دشتیاری اَت….

منا شر شر یات نہ انت , اولی رند ءَ من صبا کدی دیستگ اَت بگندے اے لازم ھم مہ بیت….منی ترانگانی پتینک ءِ تہا تہنا اے نکش انت آ 1986 ءِ سال اَت , من کلاس دو ءِ نودربر اِتاں , منی کماش ءَ ماں لیاری کراچی ءَ غریب شاہ روڈ ءِ سرا "شرف کتابجاہ” ءِ نام ءَ دوکانے ھست اَت…..اے دوکان بلوچی کتاب ءُ بلوچ ندکارانی بنجاہ اَت….کھدر پوش صبا دشتیاری من ھمودا دیستگ اَت….کماش ءُ صبا برات گونگیں سنگت اِت اَنت پمشکا صبا ءَ دائم منا "برازتک” ءِ نام ءَ توار کتگ اَت…..ناکو ءُ برازتک ئے ءِ اے سیادی 1996 ءَ استاد شاگردی ءَ بدل بوت بلے استاد ءِ دپ ءَ چے برازتک نہ شت….

2011 , جون ءِ گرمیں ماہ ءِ اولی روچ اَت , من سالونک اتاں… نوکی ھالتاک "توار” ءِ کارگس ءَ سربوتگ اتاں کہ کوئٹہ ءَ چے استاد ءِ فون اتک "اڑے سالونک اے شمئے اخبار انگت نہ رستگ وَ , شما چے کنگ ئے”…..منی ءُ استاد ءِ نیام ءَ اے گڈی ھال اھوال اَت….جنوری ءِ ماہ ءَ وھدے آ کراچی ءَ اتکگ ات , من استاد ھال داتگ اَت, من مارچ یا اپریل ءَ سیر کنگا دلمانگ اوں منی سیر ءَ تئی آیگ الّمی انت بلے مارچ ءَ وھدے من سیر کت استاد ءَ چہ آیگ ءَ پہلی لوٹ اِت ءُ پنچ ھزار کلدار گوں اے پیمان ءَ راہ ئے دات کہ ھردیں کراچی ءَ کایاں نشار ءِ دست ءِ چاھ ءَ سدی سد وراں…..

منا یات انت کوئٹہ ءَ روگ ءَ پیسر استاد ءَ منا جست کت "اڑے تئی سیر کدی بیت؟” من گوشت , مارچ ءَ چیا کہ اپریل ءَ خلیل بلوچ (بی این ایم ءِ چیئرمین) اجازت نہ دیگا انت….استاد ءَ نزاناں پرچا جواب ترینت "برازتک منی ھیال ءَ من پدا اتک نکناں , جاور وش وش نہ اَنت”…..

استاد بلے اتک…..من وت بغدادی ءَ چے چست کت داں بانل دشتیاری ءِ پادون ءَ برت….. 2011 , جون ءِ ھما اولی گرمیں روچ اَت….ھالتاک توار ءِ نبشتانک ئے تاک ءِ کار ھلاس اَت , منی ھیال ءَ روچ ءِ چار یا پنچ ءِ نیام ءَ یک وھدے اَت , منی فون ءَ زاھد بلوچ ءِ توار اتک….”استاد صبا کوئٹہ ءَ شہید کنگ بوتگ”…..منا باور نہ بوت , استاد ءِ نمبر جت , کس ءَ چست نہ کت , پدا جت , ھما پیم اَت….گنوکی ءَ گپت , کوئٹہ ءَ ارشاد مستوئی فون کت….ارشاد مستوئی جوانیں اھوالکار اَت ءُ صبا ءِ شاگرد اَت…..آئی ءَ نادراہ جاہ ءَ چے گریوگیں توار ءَ پسو دات "زلفی بھائی , ظالموں نے استاد کو مار ڈالا”….. بازیں سالاں پد ھمے ارشاد مستوئی ءِ ساہ ھم ھما کوئٹہ ءَ پچ گرگ بوت….

چے پش کپت….دگنیا تہار بوت , چوش چون بوت کنت انوں چیزے گھنٹہ پیسر ھالتاک ءِ جست ئے کت……پرشتگیں دل نمبیں چمّانی گوما یک یک ءَ وتی کماش , خلیل بلوچ , ڈاکٹر منان , حاجی رزاق ءُ خادم لہڑی ھال دیان کت اَنت…..تستگیں بالاد پہ زور گِرّینت ءُ بغدادی ءَ رسینت…..

بغدادی ھما پیم اَت بلے گوشے گْواتاں پرس داشتگ اَت…استاد ءِ لوگ ءَ گریوگ ءُ زاری اَت….کنڈے ءَ نشت اوں , چیروکائی دل ءِ سیر ءَ گریت چیاکہ فون ءِ سرا منی گریوگ ءِ سرا خلیل بلوچ ءَ منا ھکّل داتگ اَت "مہ گریں , آشوبی گریوگ نزاناں وتا ڈڈّ بکن ءُ استاد ءِ لوگ ءَ برو پدا ھمودا چے منا فون بکن”…..

من خلیل بلوچ گوشت نہ کت من آشوبی نہ اوں صبا دشتیاری ءِ برازتک , شاگرد ءُ دوست دار اوں , پرچا ارس وتا بدار انت , جذبگانی دیما کجام دیوال ءَ بہ بنداں…..

من زاناں آ زند ءُ مرک ءِ سیادی ءَ شر سرپد اَت….آ گوتم بدھ ءِ منوگر اَت ءُ ھمائی ءِ رنگ ءَ نروان ءِ شوھاز ءَ اَت , نروان رست گڑا دراھیں کار ئے یل داتاں ابید ھمے یکے کارے کہ زند ءَ معنا بدنت…..

استاد ءَ واب گندگ بنا کت ءُ پدا ھمے وابانی پشت ءَ روچ ئے شپ کت انت….منا ھیگل ءِ فلسفہ ءَ سرپد کنان گوشت ئے "راستی ترا کدی دز نہ کپیت بلے راستی ءِ شوھاز ءَ بہ یل مدے , راستی ءِ شوھاز وت راستی انت "….آ راستی ءِ شوھاز ءَ سک دور , باز دور دراتکگ اَت…..

نیشنلزم ءُ لبزانک ءِ سیادی ءِ سرا گپ کنان گوش ایت , "ندکار ءِ سرا ھر رنگیں ازم ءُ ھیالانی سان بنت ءُ آ وھدے لبزانک کنت آئی ءِ لبزانک ءِ تہا اے دراھیں سان ھوریں رنگ ءَ یک زیبائیں دروشم ءَ دراہ بنت بلے اگاں ندکار بنند ایت ءُ پروگرام بہ ٹھینیت کہ من نیشنلسٹ لبزانک ساچاں گڑا بزاں آئی ءَ ھما تپر کنٹ کت کہ درچکانی گڈّگ ءَ آؤرتگ ئے”……آ وت ھم نیشنلسٹ اَت , آ وھدی ھم نیشلسٹ اَت وھدے بلوچستان ءِ راج دوست گل کوئٹہ ءَ نشتگ بلوچستان ءَ ونڈ ونڈ کنگ ءُ ورگا اِت اَنت بلے چہ درستاں پیش آ گوتم بدھ ءُ فلسفہ ءِ چیلا اَت…..انسان ءِ آجوئی ءِ منوگر , چاگرد ءَ بدل کنگ ءِ راھانی شوھازیگ اَت…..

آ بلوچی لبزانک ءُ بلوچ سیاست ءِ بے رھبندی ءِ سرا سک پدرد اَت , جاھے نبشتہ کنت کہ ما نراجیت ءُ بے سمائی ءِ آماچ انت , لبزانک گوشے چورہ انت ھرکس کئیت لئیب کنت ءُ پدا ھکم دنت نی منی پشت ءَ بوشت اِت…..زانت کار ءُ سرپدیں مردم نگیگیں جاوراں چے دل پدرد وَ بیت بلے وژنری مردم دراھیں روچ نہ نندیت ءُ گریوگ زاری نکنت آ وژنری اَت….بگل جول ءِ گوما اے ھند ءُ آ ھند , اے دمک ءُ آ دمک تر اِت , گرد اِت , بے رھبندی ءَ رھبند دیگ ءِ جھد ئے کت….بے سمائیں راج ءَ گوں ھم دیوان بوت , سقراط ءِ رنگ ءَ راج ئے ٹوھینت….کتابجاہ ئے اڈ دات , پٹ ءُ پولی کتاب ئے نبشت , نودربراں واب گندگ ءِ سکین ئے دات….

استاد ءِ گورا وھد نیست اَت , آ کموکیں وھد ءِ تہا باز کار کنگا دلمانگ اَت….توسگ , کپگ ءُ وپسگ ئے نزانت….وت گوشیت "وھد تچان انت اگاں تو اوشتے آ ترا یل دنت ءُ رؤت پمشکا روان بکن”…..آ یک جاہ نہ اوشتات , روان ئے کت….یک روچے من لیاری لائبریری ءَ جست گپت کہ ترا کجام فلسفی دوست بیت , گوشیت , منا فلسفی نہ فلسفہ دوست بیت , برازتک ! فلسفہ ءَ مہ وان , فلسفہ ءَ ایر بر , بزانتانی گرنچاں پچ کنگ ءِ کوشست بکن , فلسفہ ترا آسر ءَ نہ بارت بلے ترا نیم راہ ءَ یل ھم نہ دنت…..

استاد ءَ فلسفہ یل نہ دات….فلسفہ ءَ استاد آسر ءَ وَ نہ برت بلے بقول استاد ءِ انچیں جاھے برت رسینت ئے کہ زند ءُ مرک ءِ نیام ءَ رستگیں کشک گار بوت….آیاں کہ آ کوئٹہ ءِ دگ ءِ سرا تیر جت ءُ گلے چت آ وَ گوشت ءُ پوست اَت , ھیالانی وشبو وَ تنیگا زندگ انت…ھیالانی وشبو زند ءُ مرک ءِ تنکیں بندی جاہ ءَ کجا دارگ بنت…..

استاد ءَ من ھال دیگ لوٹاں کہ راج ءَ جون ءِ اولی روچ بیھال نہ کتگ….بزاں تو سیاہ تہاریں شپ ءِ دست ءَ پروش نہ وارتگ…..کئیت سھبے کہ نام ئے بانگواہ انت…..

Facebook Comments
(Visited 35 times, 1 visits today)

متعلق ذوالفقار علی زلفی

ذوالفقار علی زلفی کل وقتی سیاسی و صحافتی کارکن ہیں۔ تحریر ان کا پیشہ نہیں، شوق ہے۔ فلم نگاری اور بالخصوص ہندی فلم نگاری ان کی دلچسپی کا خاص موضوع ہے۔