مرکزی صفحہ / بلوچی / منــــا اے شہــرءَ دمانے ھم وش نہ بیت

منــــا اے شہــرءَ دمانے ھم وش نہ بیت

بالاچ قادر

مہـــروان، سلامت بات ئے………….!! لہتیں روچ اِنت کہ زِمستان گوں درد چکاریں احولانی ہواریءَ شہرءِ پادمال کُتگیں دمکانی زینت جوڑ بوان اِنت………………مردُمءَ ہمےسما بیت کہ موسم پہک ءَ مٹ بیتگ، پرچا مہ بیت،اے شہـــرءَ وَ ہر روچ مردُم مٹ بنت………!! موسم وَ انگت سالانی سرءَ مٹ بنت بلئے اے میتگءِ شُشتگیں مردُم ھمک دمان وت ءَ بدل کنگ ءَ چکءُ پد نہ بنت. زمستانءَ ہردیں کہ شپ مانشانیت تہ ســــارتیں کؤشے ءِ دِلکشّیں شیکّگ گوں احوالےءَ درائی دئینت…………

انچیں احوالے کہ اشیءِ ِ تہــا سُتکگیں میتگےءِ گِسانی پریات مان اَنت، انچیں احوالے کہ اشیءِ اندرءَ ویرانگیں جنگلے گِلگ کنگءُ گریوگءَ اِنت، پہ بے وپائیں کپوتانی ہاترا …….. اَنچیں دِل بُّریں احوالے کہ اشیءِ تہا ہما میتگ ءِ پُلک چکاریں زہگانی کسہ ہوار اِنت کہ ہمک روچ گوں شُد ءَ جنگ کنگ ءَ اَنت، گوں بزگی ءَ جنگ ءَ اَنت، گوں اے مُلک ءِ لگتمال کنوکیں نظام ءَ جنگ کنگ ءَ اَنت………………..!!

کؤش ءِ سارتیں شیکگانی تہــا گِــسرکپتگیں ہمراہے ءِ شیرکنیں بولی اَنت کہ ہلوت کنگ بندات کن اَنت، زمستان ءِ برپ ریچیں کؤش ءِ ھمراھی ءَ تہلیں یاتانی گُبارے شنگ بیت. میتگ ءِ رپتگیں پیرمردانی یات……..بانگواہ ءَ چُل ءِ ســرا چاہ جوڑ کنوکیں مــاتے ءِ یات………گوریچ ءِ کہــریں شیکگانی تہــا جنگلءَ زند شوھاز کنوکیں پِتے ءِ یات…….وتیگانی یات ءُ درامدیں مردُمانی مہــروانی ءِ یات سرکشگ بندات کن اَنت. ءُ پدا وہدے شپ وتی سریگ ءَ لونجان کنت تہ یاتانی ہلاس نہ بؤکیں لڑے چؤل جنت…..ءُ من چو لاچاریں ناحداے ءِ پئیم ءَ نیم ساہیں بوجیگےءَ سوار باں ءُ چؤلانی گورگِنداں گوں مِرانءَ زندگ باں…………………..!!

شپءَ یاتءُ زہیرانی دریگ ہرنیمگءَ پچ بنت.من چو اہد جتگیں پیــرمردےءِ وڑءَ جَنڈُکیں شالے مانپوشاں، مِرمِرانکیں کندیلےءِ دیم ءَ ننداںءُ جیڑگ بندات کناں……….. ہمے جیڑگانی تہا من اَنچو گار باں کہ کندیل ءِ وٹ ہم ہلاس بیت بلئے من جیڑگ ءَ دم نہ براں. برے برے من جیڑاں، دریگتیں اے شہرءَ زِمستان مہ بوتیں…..اگاں بوتگ اَت گُڑا کدی ہم شپ مہ بوتیں………….

اے شہرءَ من ءَ چہ شپاں بیم کئیت، پمیشکا ہمک روبرکت ءَ تیاب ءِ لمب ءَ ننداںءُ ندارگ چاراں……. برے برے دل گوشیت وتی لُکیں دستانی زورءَ چہ روچ ءَ چنگے بہ اڑیناں دانکہ ایر مہ بُکیت بلئے ہچ وس نہ رؤت. مہــروان،اے شہرءَ منا چہ شپءَ تُرسیت پرچہ کہ من تہنا باںءُ تہنائی پہ من عزابے…… جنجالےءُ قیامتے.مرچی ترا پہ دِل گُوشاں کہ اے شہرءَ من ءَ را دمانے اوں وش نہ بیت.

Facebook Comments
(Visited 25 times, 1 visits today)

متعلق بالاچ قادر

بالاچ قادر
بالاچ قادر نوجوان طالب علم ہیں۔ گوادر سے تعلق رکھتے ہیں۔ سماجی موضوعات پہ بلاگ لکھنے میں دلچسپی رکھتے ہیں۔ balachqadir23@gmail.com