مرکزی صفحہ / بلوچی / غلام حسین غلام۔۔۔ کندگ نمیران اَنت

غلام حسین غلام۔۔۔ کندگ نمیران اَنت

چندن ساچ

مُدام منی ذہن ءَ اے گپ کیت کہ کراچی ءُ بلوچی لبزانک، اے بن گپ ءِ سرا پٹ ءُ پولی کارے بہ کناں کہ بلوچی ءِ اولی آزمانک ءِ نبشتہ کنوک ہم لیاری ءِ جہمنند بوتگ ءُ بلوچی ءِ اولی غزل ہم ملنگ شاہ ءَ گشتگ کہ آ ہم لیاری ءِ مردم بوتگ۔ بلوچی ءِ اولی ماہتاک ءِ گپ ءَ بہ کنیں گڑا آ ہم کراچی ءَ چاپ ءُ شنگ بوتگ۔ بلوچی ءِ کجام شاعر ءُ ادیب ءَ وتی زند ءِ موسم ہمے کراچی ءِ دمکاں نہ گوازینتگ اَنت؟ بانل دشتیاری، سید ہاشمی، خیر محمد ندوی، احمد زہیر، احمد جگر، مراد ساحر، بیگل، میر احمد دہانی، صبا دشتیاری، عباسی علی زیمی، کریم رضا ۔۔۔۔۔ اے نامانی دراجیں لڑے ۔۔۔۔۔

اے پٹ ءُ پولی کار کنگ ءَ باز وہد ءَ کلم ہم چست کتگ ، بَلے اے کار سرجمی ءَ ہچبر نیاتکگ۔ اِدا یکے منی سُستی بوتگ ءُ دومی نیمگا نودربری ءِ جنجال ءُ پدا پہ وانگ ءِ ہاترا کار ءُ روزگار ءَ ہم اے کار ءِ نیمگا من ءَ داشتگ۔ بَلے انسان پہ امیت۔

کراچی ءَ بازیں نامے ودی کُتگ، مروچی ہم آ ہمے چاگرد ءِ زینت اَنت ءُ بلوچی زبان ءُ لبزانک ءِ حذمت کنگ ءَ اَنت۔ چشکہ سید ہاشمی کتابجاہ، نوکاپ لبزانکی مجلس، مستاگ فاؤنڈیشن ءُ اے دگہ لبزانکی ءُ چاگردی گلانی بیل ءُ بیلی کار ءَ اَنت۔ اے درسانی حذمت ستا ءِ لائک اَنت ءُ بے بہا اَنت۔
زندگینانی حدا حیر ءَ وت بہ کنت
مرتگینانی ارواہ گسر بوتگ اَنت

لیاری ءِ نامانی تہا یک نامے استاد غلام حسین غلام اَت۔ بَلے اے مرد من اناگہ ءَ دیست۔ بزانکہ بندات ءَ کہ 2006 ءَ من کراچی ءِ دیواناں اے مرد ہچبر نہ دیستگ ات۔ اے مرد اولی رند ءَ من نوکاپ لبزانکی مجلس ءِ دیوانے ءَ فقیر کالونی ءَ دیست کہ آئی ءَ وتی غزلے ونت۔ آئی ءِ غزل ءَ چہ گیش آئی ءِ وانگ ءِ انداز ءَ مارا وتی نیمگا بُرت۔ وہدے کہ جوش ءَ اتکگ ات گڑا کندگانی ہمراہی ءَ غزل ئِے گشتگ ات۔
لہتیں گوج، لہتیں چوپ گوات ءَ بدئے.

لہتیں دست ءِ دل ءَ لتار حبر
ایشی ءَ اے شعر انچیں اندازے ءَ گوشتگ ات کہ مردم ءَ نہ زانتگ ات اے ہما مرد اِنت کہ دیوان ءِ ہاموش تریں مردم اِنت۔ غزل ءِ وانگ ءَ ایشی ءَ انچیں جوشے ءِ تہا آورتگ ات۔ گوشئے زاناں آ مئے دیما نہ نشتہ بلکیں وتی مہلنج ءِ دیما نشتہ ءُ شعر وانگ ءَ اِنت۔
قصہ عشق ءِ وَ اینچو دراج نہ ات
کہ ہمک ءَ کُتہ ہزار حبر

پدا من غلام حسین غلام بازیں دیواناں دیست۔ آ مُدام کندگ ءَ ات۔ آئی ءِ کندگانی پُشت ءَ چنچو درد اتنت اے دردانی بابت ءَ من ہما روچی زانت کہ آ ایس آئی یو ٹی ءَ داخل ات۔ اودا کہ من آئی ءِ گندگ ءَ شتاں گڑا اودا ہم گوں کندگاں آئی ءَ من ءَ وش اتک کُت۔

آ تحت ءِ سرا نشتگ ات ءُ انار ورگ ءَ ات۔ رحیم کامریڈ کہ آئی ءِ بچ اِنت۔ ہمودا نندوک ات۔ من گپ گپ ءِ سرا دلبڈی دات کہ استاد دل ءَ مزن کن اللہ بادشاہے حیر بیت۔ آئی ءَ گوں کندگاں گوشت ہو منی دل مزن اِنت بَلے من اینچو زاناں کہ منی نادراہی یکے نہ اِنت باز اَنت۔ چارگ ءَ پد من آ رخصت کُت۔ من نہ زانت کہ اے مئے گڈی دیدار بیت۔

جہل ءَ من ءُ رحیم اتکیں۔ رحیم ءَ من گوشت کماش ءَ سمبال ءُ کماش ءِ شعراں ہم شوہاز کن۔ اللہ کماش ءَ صحت بہ دنت۔ پدا ما کماش ءَ گوں نند ءُ نیادے ہم کنیں۔ انٹرویوے ہم بیت۔ بَلے اے درسیں واب 11 جنوری 2018 ءِ گوربام ءَ اتکگیں میسج ءَ گوں وت بے معنا کُت اَنت۔ میسج غلام حسین غلام ءِ بچ رحیم کامریڈ کتگ ات کہ۔ چندن یار کماش ءَ وفات کُت۔ گوں اے میسج ءَ من اجکہ بوتاں۔ بس دپ ءَہمنچو در اتک۔۔۔۔۔ اڑے۔۔۔۔۔۔ اِے اڑے منی زرد ءِ آواز ات کہ ۔۔۔۔۔ ءُ پدا بے تواری ات ءُ غلام حسین غلام ءِ عکس ات گوں کودکیں کندگاں۔۔۔۔

یکش ءَ بحت غلام ءِ کپتہ
وت وتی پُرس ءِ سرائیں مرچاں

Facebook Comments
(Visited 22 times, 1 visits today)

متعلق چندن ساچ

چندن ساچ
چندن ساچ نہ صرف بلوچی نثر کے اچھے لکھاریوں میں شمار ہوتے ہیں بلکہ ایک سنجیدہ شاعر بھی ہیں۔