مرکزی صفحہ / براہوئی / آہ….. کنا مسڑ زینب!

آہ….. کنا مسڑ زینب!

نوشتہ: انجم براہوئی

نے سما اے نن صدی تا سے نہاراتا گواچی ان. دانہاراک وخت ئس نے آن بارنگا چنکا, برٹ او نازرک آ سو تا مزہ ئے ہلیرہ تو وخت ئس دافتا است مچہ ورنا او بھلن عمر نا سو خوائک ہرافتے کہ او نے آن مچہ بھلا و مچہ ڈلہ غا سوتے چونڈرہ او وخت ئس تو دافتا سو کننگ نا است خواہی بھاز مونی کائک دافک بِسّن او پکھا او سو کننگ نا است خواہی کیرہ. تینا ہمو است خواہی کن او ننا لمہ او جاگہ جاگہ تو ننا بلہ غاتے آن ہم سرفائنگ پسہ.
زینب…نی تو پدا ہم خوش قسمت اس کنا چوری کہ نا چونڈوک آ ہڈ آک خننگار, نے کن نن است نا ارمان ئے شولننگ کینہ, تینا زان تے آ خلننگ کینہ, پٹنگ ہوغنگ کینہ, کاٹم آ مش شاغنگ کینہ او داخس ہم کننگ کینہ کہ نا بچوک آ ہڈ تے شرف اٹ پیہنو پچ سے ٹی تفسا اوفتے تینا رسم نا رداٹ گورٹی تخننگ کینہ ولے…
ولے زینب نے سما اے… شاید نا خاہوتے یا نیکن ہوغوکاتے آن بھاز کمے سما مرو کہ نن صدا سال تاسے ہندن پاکہ نہارستان سے ٹی ساہ ہلننگ ٹی ان. دا نہارستان نا نہاراک اینو اسکان نن تون انت کتنو دانا حسابے تخنگ داسہ تو تاریخ نا وس آن ہم پیشن مسنے.
بیڑی آ وسم آ زینب نی خننگاس ولے کنا ہزارا چناک داسہ ہم نہارا تا ڈیھ ٹی بے گواہ او, کنا ہزارالمہ غاک تینا تینا زینب آتے کن صدا سال تا اے کہ خن کسرا مرسا مرسا خن تے آن تمانو, بھازاک تو دا انتظار اٹ تینٹ زند آن دو سلار ولے اینو اسکان نہ اوفتا زینب آک پدا بسر نا اوفتا ہڈ او ہوج اس خننگا.
نن تینا زینب آتے شان او شرف اٹ جہ او جاگہ کننگ کن زہیر کرین ان, دا نہارستان نا قبرستانک داسہ داسہ بندغ کھڈ کننگ کن اف اس. دافتے ٹی نن تینا اگہ اسہ گڑاس کھڈ کینہ تو او ننا ارمان او ڈکھ آک او انتئے کہ ننا زینب آک نہاراتا پھڈاتے ٹی او.
زینب نی خوش قسمت سے اس کہ نہارستان نا نہار تا پھڈ ٹی قبر مننگ آن بچاس, آخہ تو داڑے پیڑی تا پیڑی نہارستان نا نہارتا پھڈ آتے ٹی بے گور او کفن گوئنگانو او اینو ہم گوئنگسہ اریر.
زینب کنا چوری دن اف کہ کنے نا نہاری مننگ نا ڈکھ اف. یا ای نے تینا ایلو چنا تے آن کم تکوہ. خدا کپ کہ دن مرے. کنا سینہ ٹی ڈکھ آتا جتا جتا رد او ریسہ غاک ساڑی او ہراڑے ای نا ڈکھ آے تینا ڈکھ آتا زیبا غا رد او ریسہ ٹی جہی کننگ ٹی اٹ. ای خواوہ کہ نا ڈکھ اے تینا ڈکھ آتا خوش گوارا دریچہ ٹی تخو کہ نی نہارستان نا نہار تا پھڈ ٹی افیس بلکہ کنا دوٹی اس.
نا ڈکھ نا مقابلہ ٹی ای ڈکھ آتا اسہ پین ہم بھلو دنیاسے نا خواجہ اٹ سال تا سے بلکہ صدی تا سے کہ ای ڈکھ آتا پلویڑ ٹی اٹ. داسہ تو ڈکھ کنا میراث جوڑ مسنے. کسے ڈکھ آتا کچے کروئی مرے تو برے کنا زینب آتا لمہ غاتا سینہ ئے کچ کے ہراڑے ہڑدے کنا زینب آتا نہاری مننگ نا داستان ناسور نا ردوشم اٹ ساڑی اے.
کنا ڈکھ آتا داستان ٹی ڈکنگوک آ کنا بےوسی بس داخس اے کہ مدام تینا ئی نا پنٹ, تینائی نا سل بینوک, تینائی نا دروشم اٹ نہار جوڑمرسا کنے چونڈسا, گوئسا, خلسا, پرغسا او کیدساڈکھ آتا دنیا ٹی بٹوک آ نہاراک کنا جندنا پن ہلننگرہ.
زینب نے سما اے کنا ایلو ہزارا زینب آتے بے گور او کفن کروک آ نہاراک ہراتم تینا بائے شیڑ کیرہ تو کنا است ایکیم مریک کہ اوفتا نہاری آ بشخندہ غان کنا خزم آتا لاش تا گند بریک او ای نہارستان نا لیڈر پنی آ دا نہارتے مونی انت کہ پاو پاو ولے تہ ٹی دافتے تینا خزماتا زندہ قبرستان تکوہ. لیڈر آخا کنا زینب آتا زندہ قبرستان.

Facebook Comments
(Visited 29 times, 1 visits today)

متعلق براہوی حال حوال

براہوی حال حوال