لیطیفیات

براہوئی انشائیہ غاک
نوشتہ : حاجی عبدالطیف بنگلزئی
1:سنگت کنے پارے :
"کچآری ٹی تولوک ہشتاد پنچ کماش خون فیصلہ نا سیونج و گڑتی ٹی مغز خلکرہ !
نیامیکو بالشت آ تولوک سڑدار تینا ہشتاد پنچ ہزار نا موبائل آ دوشہ گوازی ٹی آختہ اس!!”
2:” نسل ”
"آہن گھڑ” نا مار بوتار نا مسٹمیکو دے غلغلو آ خنتے صفا کرسا تینا باوہ غان ہرفے :
"باوہ جان ! داڑان گڈ دیر سڑدار مریک !”
باوہ پارے :
"بوتار نا مار !”
” اگہ سڑدار نا مار ہم کوڑی ئے الا ؟!” مار ہر فے ،
"او نا مار !” آہن گھڑ پار ے ،
"ولدا….،…………….!؟”
"اونا مار !!”
"ولدا……………..!!”
"اونا مار ؟”
"اونا مار "______ولدا اونا مار _____ولدااونامار__،____ ولدا اونامار _____ولدا______ولدا _______ولدا ____؟؟!
” اونامار ،_____اونا____اونا _____اونا !!
نیٹ پامدار آ آہنگھڑ کک مس ، مارآن ہرفے :
"کنا خن تا روک ! نی تلوسئی ئیٹ دا ہیتے انتئیے ہرفیس !!؟”
مار تینا خازگی آ چغ ئے خؤارفیسا پارے :
"ایھ……………. ایھن…………… !!”
اینو ہم آہن گھڑ نا کڑاسہ سڑدار نا نؤاسہ نا آہن گھڑ ئے !!!
3:”پت”
” نی کنا ایلم نا جاگہ غاار یس !”
"نی کنا باوہ نا جاگہ غاٹس !”
"نم کنا مسنتا جاگہ غاٹرے !!!”
دا وڑ ئنا ہیت آتے ہر آسٹ تون کننگ کیوہ !
ولے خدا چاہے اینو اسکان ہچ کس ئے دا پاتنٹ :
” نی کنا ذائیفہ نا جاگہ غاٹس !”
انتے کہ داڑان بھلو بد اعتمادی ئس بش مریک ; ولدا نمے دا ہم سما ئے کہ اعتماد، اعتماد مریک ، گڑا پھانے او چھنک مرے یا بھلن !
نیاڑی آ مرے یا نرینہ غا…….!!
4:” خن تر ”
نن سما ئن !
ننے سمائے نن انتئے سما ئن !!
بے سمائے سما اف ، او انتئے بے سمائے ____!
سماانگاک ہراتم بے سماتے سما ایترہ،گڑا بے سماک خرین تغ مریرہ_____!!
تغ ہنین ئے ، ولے بے تغی ٹی اسہ جتاؤ ہنینی ئس گجہ خننگک !
"سما”خنتہ ملیک و بے سمائی آن خنک تر مریرہ——-!!
” خن تری” ئے عیب پارینو—–و—–"خن توری” گوازی سے ! گوازی ساعت تیری سے، شڑط دادے کہ "باوہ نا ریش” تون مف !!
ای گوازی گوازی ٹی سما ئٹ !
ہراتم دا گؤازیک خلاص مسر ، چاس کہ کنا خنک تر مسر !!!
5:* گلہ *
ای امیت آن ہرفیٹ :
"گلہ دیر آن کیو !؟”
پارے :
"شکوہ اللہ غان کپہ کہ گنہگار پاننگسہ !
بندغان کپہ کہ مایوسی مریک نے !!
تقدیر آن کپہ کہ ہچ بنپک !!!
راج آن کپہ ، کہ موکل اف !
تینا جند آن کپہ کہ گنوک پاننگسہ !
تینا ہوش تون کر ، کہ سوچ ئنا دریاؤ مننگ ٹی ئے !!”

( کنا انشائیہ غاتا کتاب "گڑگیس” آن ہلوک)

Facebook Comments
(Visited 21 times, 1 visits today)

متعلق براہوی حال حوال

براہوی حال حوال