مرکزی صفحہ / بلوچی / من انگت سپرءَآں

من انگت سپرءَآں

نزردوست

مارا سک دِیراَت کہ وتی شَھرءَ چہ درآتکگ ءُ وتی مردماں چہ جُتا ءُ ودگ ودگ اَتیں ـ شپ جاہ ءُ روچ جاھے ! بَرے ما مَسیّتاں واب اَتیں ءُ بَرے زِکرھانہ ءُ پَچیں پَٹاںـ

باز بَرءَ ,,,, ما پہ نازانتی یک دومی جُست کُت کہ ما کُجءَ رَھادگیں؟ ءُ مارا داں کُجءَ سربوگءَ پَدواتربوگی اِنت؟

اے جُست پہ مانوک نہ اَتءُ نئے کہ کوھن اَت پمیشکا اے جُستءِ پَسّو مئے میاںءَ بس بے تواری اَت ـ اَنچش گُماں بوت کہ اے جُستءِ پَسّوھم بے تواری اِنت یانکہ اے جُستے ھم نہ اَت ـ بس لھتیں بے مانائیں دانک اَت اَنت یاں کہ ھمے جُستءَ چہ پَد مئے میاں ءَ کہ جاگھےھَورک بوت آئی ءَ را بس بے تواری ءَ پُرءَکُت ـ

بے تواری مئے ھمبل ! ءُ ماآئیءِ ھمراہ اَتیں ـ بے تواری چہ ماپیسرءُ ماآئی ءِ رَندپَداں اَتیں ـ پمیشکا بے تواری پہ ما دردے اَت ھم ءُ یک درمانے اَت ءُ ھورکیں جاگھانی پُرکنوکیں دانکے اَت ھم ـ

نوں پہ ماشَپ دَری ءُ وانڈھی ءَ را اِنچوکیں بلاھیں بساتءُ بستارے نیستگ اَت ـ
بَرے ما شپءَ سَپرءَ اَتیں ءُ بَرے روچءَ ـءُ ماھِچ نہ زانت کہ ماکُجءَ رھادگ ایں؟یانکہ مئے منزل داں کُجءَ اِنت؟

باز بَرءَ مارا پاداں بُرت ءُ بازبَرءَ واب ءُ ھیالاں ـ
مئے سَرا بازیں کُلوہ ءُ کاسدے ھم آتک کہ واترکن اِت ءُ بیائے اِت ـ بلے ما پہ جُنزگءُ سَپربُرّگءَ ھَماروچءَ ایمان آورتگ اَت کہ آروچءَ میتگءُ شھراں بس زالبولءُ کسانوکیں تپل پَشتکپتگ اَت اَنت ـ

پَدءَکہ جاورکمیں گیگ تِربواں بوت اَنت گڑا آدگہ درست واتر پہ ھَنکینءَ شت اَنت ءُ پہ ما بس وانڈھی ءُ سَپرپَشتکپت ءُ پَدءَ ھمااِنت کہ ما سارتیں ساھگ ءُ نپادی واب نہ دیستگ اَت ـ

مئے چمان منزل ادءَ نہ اودءَ اَتءُ مئے سَپردروھاپے اَت تَگے ما ءُ تَگے دروھاپ اَت ـ
یک شَلیں سَپرءَ مَرچی اناگتءَ مئے سَریک ناشناسیں ھَندےءَ آورت ءُ سَرکُت ـ روچ کپتگ اَت ءُ نوکی شَپ بوگی اَت تھاری نوک ماندیاں اَت ما اِرادگ کُت کہ ھمے شَھرءَ شپءَ روچ کنیں ءُ باندءَ سھبءَ وتی کِشکءَ گِریں ءُ پہ وت رھادگ بَئیں ـ
ھمے دَماںءَ مُلاءِ بانگءَ مئے پادوتی نیمگءَ ھُرجان ءُکشّاں کُت اَنت ـ

ماپہ شپءِ تیلانک دَیگ ءُ دوزھیں لاپءِ ھاجتءَ مُلاءِ دَر ٹُک اِت ـ
نیم اُمبریں مردکے کہ ریشءِ نئے کہ سک دراج اَت اَنت ءُ نئے کہ کساں اَت اَنت ـ دَرءِ دَپءَ مارا وش آتک ئے کُت ـَ

ما مھمان ایں مارا شپ کپتگ ـ
شما نماز ونتگ؟ مُلاءِ اولی جُست ـ
اناں ـ ماھَردُکاں یک زبان ءَ پَسّوکُت ـ
من وت مھمان آں ـ

آمَسیت کہ ٹُلءِ نوکی دَرا بیت ھمامَسیت ءَ بروئے ءُ دیمی نیمگءَ ھورکیں کوٹی یے ھَست ھَمودءَ وتی شپءَ روچ بہ کن اِت ـ

ما پدءَ رھادگ ءُ آتکیں کوٹیءَ سربوتیں دارءِ دروازگ ءِ کڈی بُتک اَبیتکیں کوٹیءَ بس لھتیں نپادءُ لھتیں کوھنیں سرجاہ پہ دیم کپتگ اَت اَنت ـ
کوٹی سرجمءَ ھُشکیں دَنز ءُ گُبارے اَت ـ

مانوکی تَچک داتگ اَت کہ کسانیں بچکے گوں چِراگےءَ آتک ءُ مئے پجارءِ جُست کُت اَنت ـ
من علی مراد ءُ اے منی سنگت ھُدادوست ـ
شماکُجءَ نشتگ ئے؟
ماوت نہ زانیں منی سنگتءَ پَسّوکُت ـ

اے منی پِت ءِ میتگ اِنت اے مسیت منی پتءَ بستگ اے شھرءِ مسترھم منی پِت اِنت ـ پِت ءَ چہ پَداے دیارءِ ھُدابُندمن باں ـ
ما دوئیں بے توار اَتیں ـ
کسانیں بچک رَپٹاں اَت ـ

چو ـــ چوں بیت کنت؟شماچوں نہ زاں اِت کہ شماکُجءَ نشتگ اِت؟
اے گنوکے سرءَ وش وش نہ اِنت
من ءَ تھمبل بوگءَ نہ اَت ـ
من لوٹ اِت کہ دگہ جست مہ بیت ـ

اے گپ پہ ما نوک نہ اَت ءُ اے اولی شپ ھم نہ اَت کہ ما ھمشام ءُ شُد لاپ اَتیں ـ
اے گنوکے؟بچک پچگڑتگ اَت ـ
ھَو ـ من بس ھو کُت
ایشیءَ گڑا تو کُجءَ بَرگ ئے؟
پہ ایشیءَ من شریں مُلائے پٹگ آں ـ
مئے شھرءَ وڑ وڑیں مُلا ھست زگری نمازی چونیں مُلا لوٹے منی پِت ھم شَریں مُلاھے ؟
آئی ءَ یکیں گیںءَ سجھیں گپ گُشت اَنت ـ

من دلءَ گُشت اے ھورکیں لاپءُ اے دَمبرتگیں جَبین ءَ اِنچوپَسّوماں نیست ـ بلے تو کہ سرءَ نہ کپے ـ
اے شَکم ءِ مادر اَنچش نیم سار اِنت ـ
اے تئ چے اِنت؟
سنگت ایں ـ
ھاں ـ
باندا گڑا شما کُجءَ روئے؟

ما وت نہ زانیں منی سنگت ءَ پدءَ پہ بے دلگوشی پَسّوکُت ـ
بچک کمیں دگہ وڑ بوت ـ منی گوشءِ کِرا سُکسُکءِ کُت واکی گنوکے ـ
ھَو من بس ھَوکُت ـ

شماباندا کجءَ روئے بچک پدءَ منی گوشے کِرا آتک ءُ الوتءِ کُت ـ
ما وت نہ زانیں ـ
چے ؟ تو ھم نہ زان ئے؟ بچک ھَزتگ اَت ءُ من اَمنچودیست کہ اشتاپءَ پادآتکءُ دیم پہ دَرءَ شُت ـ

سرجمیں شپ من پہ نیم واب ءُ نیم آگھی گوازینت مُلاءِ بانگ ءَ گوں من لوٹ اِت کہ سنگتءَ پادکناں ءُ جنزاں باں ـ
اے وھدءَ کوٹی ءِ دپءَ جُتکے سواس تا بہ تا ءُ سرماں چَک کپتگ اَت اَنت ـ
من اَجکھہ ءُ ھیراں اَتاں ـ

روچءِ دَرآھگءَ گوں من وتی کوھنیں کِشّک گِپتگ اَت ءُ ایوکءُ تھنادیم پہ ھَنکیں ءَ ھادگ اَتاں ـ

Facebook Comments
(Visited 10 times, 1 visits today)

متعلق نذر دوست