مرکزی صفحہ / بلوچی / حیال ءِ دستاں جون

حیال ءِ دستاں جون

اِے آر داد

ادا آہگ ءَ گوں تب آسے بوتگ۔ ہر روچ گمان بیت کہ آس منی پشک ءِ دامن ءَ سر بیتگ۔

ہمیش اِنت کیت نوں جان ءَ سر بیت، چماں سوچیت، ساہ ءَ سوچیت۔
چو نہ اِنت ۔۔۔۔ اے منی وسوس اِنت۔ اے شہر ءِ داتگیں بے زبانیں سوگاتے۔ ھو؟ راست اِنت؟

ھو زاناں ترا باور نہ بیت۔۔۔۔۔۔ ماہ ءَ بیت، روچ ءَ بیت من ءَ چون نہ بیت؟ ۔۔۔۔ ادا دگہ کس نیست بیدئِے من ءَ ۔ من وت ءَ گوں گپایاں، منی چم، منی گوش اَنت۔ منی پونز اَنت۔ ءُ منی ساہ اِنت کہ دل ءَ چہ دُور اِنت۔

چراغ ءَ کُش ۔۔۔ شپ ءَ شپ وشتر اِنت۔۔۔۔ نہ مہ کُش ئِے، من ءَ ترسیت۔ شپ روچ بوت شہر ءِ دریگ شم بیت اَنت۔ مردماں چم لگاشت انت دست وتی حون کُت اَنت۔

اے شہر ءَ انسان نشتگ اَنت کہ دلوت؟
زاناں تو پیسر ءَ نہ اتکگ ئے۔
بہ اتکیناں گڑا ترا جُست کُت؟ ۔۔۔۔ انسان کم تر اَنت دلوت زیات۔ اے شہر ءِ درچک نادراہ اَنت۔ پُلانی سرین گون نہ اِنت۔ شانتل کور اَنت جمبراں چہ دیمتر نہ گوزنت۔

اد ءِ مردمانی زبان لونجان انت۔ من ءَ وَ نندگ نندگ ءَ انچو گمان بیت کہ من مراں من ءَ چیزے لگت دنت ءُ کُشیت۔۔۔۔۔ ءُ برے برے کہ دروگ بندیں کسے گنداں تہ دل گوشیت، بجن بجن کُش اِشی ءَ چی ءَ زندگ اِنت۔ بَلے ہمے دمان ءَ حیال منی گورجیگ ءَ دستاں بارت۔ تو کہ اشی ءَ کُش ئے گڑا ترا ہمے دمان ءَ کسے سنگے جنت۔ ۔۔۔ برو بے دل!

اینچو ترس ئے چی ءَ؟ راستی ءِ راہ ءَ مرگ زندگی اِنت۔۔۔ ہو ؟ تو ونتگ کہ کسے ءَ گوشتگ؟ ۔۔۔ تو گوں وشی سر کن ئے منزل ءَ چراغ ءَ کُش۔ شپ ءَ شپ وشتر بیت۔

روچ بوت شہر ءِ دریگ شم بیت اَنت۔ مردماں رو آ بنا کُت۔ ہمے راہ ءَ کس نہ گوست۔ منی جون ایر اَت۔ جون ءِ سر ءَ کاگدے ایر اَت نبشتگ اَت۔
شپ ءَ شپ وشتر اِنت۔

(اے آزمانک، اے آر داد ءِ کتاب دریگے پچ بیت، ءَ چہ زورگ بوتگ)

Facebook Comments
(Visited 28 times, 1 visits today)

متعلق اے،آر داد

اے،آر داد
اے آر داد بلوچی ادب کے استاد اور نام ور ادیب ہیں۔ بلوچستان یونیورسٹی کے شعبہ بلوچی سے وابستہ ہیں۔ بلوچی تنقید اور افسانے کی اُن کی متعدد کتابیں شائع ہو چکی ہیں۔