مرکزی صفحہ / بلوچی / کوہنیں یاتانی دوزح، نوکیں سال

کوہنیں یاتانی دوزح، نوکیں سال

چندن ساچ

2017 کہ بندات بوت گڑا بازیں وابے دیست، بَلے مروچی کہ 2017 ہلاس انت نوں جیڑاں کہ باریں من سال ءِ بنداتی ءَ چونیں واب دیستگ؟ ہچ یات نئیت۔۔۔۔

بس لہتیں کچلیں یات پشکپتگ۔ نہ زاناں کہ ایشاں کئی دامن ءَ بہ بنداں وہد ءِ یا زندگی ءِ؟
ہمدا کایاں اوشتاں، جیڑاں، گوشئے زاناں دیما یک دمکے پدر بیت۔۔۔ ءُ من ءُ سنگتے ہمے دمک ءَ جنزانیں، زینو ءَ شر نہ کُت۔۔۔۔۔ پدا ملوریں لنٹانی سرا بچکندئے تالان بیت۔ ادا زاناں کئے شر کنت؟ کہ من زینو ءِ زنگ ءَ بہ جناں۔ کسہ رُدان بنت ءُ زند روان کنت۔ ندارگ مٹ بوہان بنت ءُ من واب کپاں، پدا جتائیانی کسہ بنت، میسجے توار کنت، میسج ءَ پچ کناں، شناسائیں مردمے ءِ ناشناسیں میسجے،
جُستے۔۔۔۔۔ پدا من وتی ہر ندارگ ءَ چہ گسر باں ءُ تہنائی من ءَ چو گوریچ ءِ مُجاں چاگرد کنت۔
ہما رکشانی ٹرٹرٹر، اے نیپا اِنت، جوہر موڑ اِنت، فرفیوم چوک اِنت، بشیر ولیج انت، گولیمار اِنت، وہد روان کنت.

عثمانیہ ریسٹورنٹ ءِ ٹیبلانی سرا ہلوتے پش کپیت بَلے ہمے پش کپتگیں ہلوت ءِ عمر اینچو دراج بیت، ما دوئیناں نہ جیڑ اتگ۔ ہلوت، زندگی پدا اینچو دراجیں زندگی گوشئے یونان ءِ دیومالائی داستانانی کارستے وتی پُرس ءِ پتر ءَ نشتگ ءُ جیڑگ ءَ بہ بیت۔ پدا وعدہانی دنیایے آباد بیت،
پچ لرزاں تہ تیاب انت سائبریا ءِ کہ مرغاں یلہ داتگ، یکے سائبریا ءِ مُرغ ءُ دومی بینگ مکسکاں ہچ وفا نہ بیت۔ اے مُدام وتی جاہ ءَ بدل کن انت۔
پدا گنداں تہ زندگی انت چو گونڈو ءَ باغ ءَ یلہ چریں پاتواں گوں لیب ءَ اِنت۔ بَلے ہچ چیز ءَ دست جت نہ کنت۔

زندگی یار تو چی یے ئے؟ زینو ءِ کسہانی کارست ءِ لنٹانی سرا بے تاہیر بچکند یا ہما شناسائیں مردم ءِ ناشناسیں میسج؟ من ترا 2017 ءَ پول ات نہ کُت۔۔

گوشنت کہ نوکیں سالے کیت۔۔۔۔ اے سال ءَ بازیں واب گون بیت۔۔۔۔۔ بَلے من۔۔۔۔ حیر وابے گندیں۔۔۔۔۔ چونیں وابے بہ بیت؟ یار بیا کہ واب ہم گچین کنگ بنت؟ گندئے گچینی واب سرجم بوتیناں۔۔۔ گڑا من وت ءَ کسہ یے کتگ ات ءُ آئی ءِ دپ ءَ داتگ ات۔۔۔۔
ما یار ہچ نہ کُت۔۔۔۔۔ برے برے گمان بیت کہ زندگی ہچ نہ کنگ ءِ نام انت۔۔۔۔۔۔ یا وَ کسہاں گوں ہوار بوہگ ءِ، نام زندگی اِنت۔۔۔۔۔

دل گوشیت 2017 ءَ ژانگے پاد ءَ بدئے ءُ رخصت کن، دانکہ گوست ءَ بہ اوشتیت ءُ بس ناچ بہ کنت۔۔۔۔۔ پدا من کہ نمبی ئیں گوربامے ءَ بست بہ کناں، راہ ءَ گار بہ باں، ہمودا سر بہ باں کہ 2017 ءَ ژانگ پاد ءَ اَنت ءُ ناچ ءَ اِنت، دانکہ من وتی بے حال کتگیں واباں فاتحہ یے بدئے آں۔۔۔۔۔ اے سال کہ پیداک اِنت۔۔۔ اے چے لوٹیت، مندریکے، ہارے۔۔۔۔۔۔۔ بَلے ما وَ انگت تُرسانی موسمائیں۔۔۔۔۔۔۔۔۔۔
نوکیں سال ءَ ہچ گون نیست۔۔۔۔۔۔ بَلے 2017 ءِ گڈی روچاں من ءَ بے وفائیں دوستدارے ءِ میسج ءَ حیران کُت۔
چندن

من پسہ دات، جی بگش،
تو مہنو ءَ زان ئے؟
من حیران بوتاں کہ ایشی ءَ چہ پسو بدئے آں؟
اناں من ئِے نہ زاناں، بس ہمنچو گوشت ءُ بے توار بوتاں۔۔۔۔۔

بَلے اصل ءَ مہنو منی اولی مہر بوتگ، ءُ مہنو ءِ بابت ءَ جست کنوک منی دومی مہر اَت۔۔۔۔۔۔ کہ دوئیں درآمد بوتگاں۔۔۔۔۔۔۔ درآمد کئے کتگاں؟ وہد ءَ ۔۔۔۔۔۔ ءُ وہد کئے اِنت؟ 2017، 2016، 2015، ہمیشانی نام وہد اِنت ءُ 2018 ہم انچیں وہدے بیت ءُ وتی گڈسرا ہم لہتیں انچیں یات پش گیجیت کہ مردم۔۔۔۔۔۔۔۔ آیاں ہچ نام دات نہ کنت۔۔۔۔

ارسی ترمپے یا پُرسی ئیں چراغے۔۔۔ بَلے منی گنوکی ایش انت کہ من مُدام پؤراں چاراں سفر کناں، پرچا کہ پؤر شپ ءَ ترا گار بوہگ ءَ نئیل اَنت۔ زندگی زانت کہ شپ ءَ گار بوہگ وش نہ اِنت۔۔۔۔۔ اگاں زندگی شپ ءَ گار بوت، گڑا بلک صدگنج ءِ کسہاں کئے گوش داریت ءُ گوشیت۔۔۔ دیما چے بوت۔۔۔۔۔ ءُ بلک گوشیت، تو انگہ واب نہ کپتگ ئے جِن۔۔۔۔۔۔۔

Facebook Comments
(Visited 33 times, 1 visits today)

متعلق چندن ساچ

چندن ساچ
چندن ساچ نہ صرف بلوچی نثر کے اچھے لکھاریوں میں شمار ہوتے ہیں بلکہ ایک سنجیدہ شاعر بھی ہیں۔