مرکزی صفحہ / بلوچی / استاد رحیم بخش آزاد

استاد رحیم بخش آزاد

ذوالفقار علی زلفی

منی ھیال ءَ 1986 یا 1987 ات شر شر یاد نہ انت من دومی یا سیمی کلاس ءِ نودربراتاں….آ وھدی منی کماش ءَ منا سک دوست داشتگ ات پمشکا ھرچ بلوچی لبزانکی دیوان ءَ من آئی ءِ ساھیگ اتاں…..لیاری ءِ بلوچ ھال ءَ لبزانکی دیوان ات…واجہ بیگ محمد بیگل , ناکو احمد دھیانی , عبدالقادر بلوچ , لالا فقیر بلوچ , تاج محمد طائر , غلام محی الدین میار , صبادشتیاری , لالا حضرت شاہ ءُ دگہ بازیں نندوک ات اَنت کہ مروچی منا گیر آیگ ءَ نہ اَنت….

واجہ بیگ محمد بیگل ءِ گوشگ ءِ سرا دیوان ءِ پاگواجہ منا اش کت , استاد رحیم بخش آزاد گوں وتی مزنیں قد ءُ بالاد ءُ بزیں بروتاں منی کش ءَ نشتگ اَت….اے اولی رند ات من آزاد دیستگ ءُ زانتگ اَت……

بازیں سالاں پد , کماش ءِ دوستی ھلاس ات , 1995 ءِ وشیں روچ اِت انت , میٹرک ءِ امتحانانی بار چہ کوپگ ءَ ایر کپتگ اَت من استاد پدا دیست…..

منی مدامی ٹھکانہ لیاری لائبریری ءُ دوستیں سنگت امان عبداللہ یکجاہ اِت انت…. مردے لائبریری ءَ پترت….گد ءِ پیلکے کوپگ ءِ سرا ات , دست ءَ میگزین ءُ لنٹانی سرا بزیں بروت بلے بروتانی اسپیت ات انت….امان ءِ چم انچو مردے سرا کپت اَنت پاد اتک , مردے پادئی دست جت اَنت ءُ پدا دست ئے گپت اَنت…..من زانت کہ اے مزنیں مردم انت , بلے کئے انت ؟؟ یاد آیگ ءَ نہ اَت….من ھم واجہ ءِ دست گپت انت…..واجہ ءَ لہتیں کتاب زرت ءُ درکپت….

"زلفی زان ءِ کئے اَت” امان ءِ جست ءُ پدا پسو دنیگا منی دل ءَ نکش اَنت "اے واجہ رحیم بخش آزاد انت , باز زانتکاریں مردم انت”….

آ روچ ءَ رند من پدا استاد گار کت….

2001 ات , مشرف ءِ فوجی آمریت ءُ لبرل ازم ورنا ات , امریکہ ءِ ورلڈ ٹریڈ ٹاور انگت تاریخ بدل کنگ ءِ دروشم ءَ نہ ات… راشد سربازی منی سنگت ات…راشد سربازی منی زند ءِ یک دردناکیں کارست انت , راشد ءِ قصہ دگہ روچے….سنگولین ءِ زگری پاڑہ ءِ دمکانی تہا یک لوگے ءَ راشد ءَ منا برت , اے رحیم بخش آزاد ءِ لوگ اَت….

وتی ھاسیں اوتاگ ءَ استاد شلوار ءُ گنج پراک ءِ گوما پلنگ ءِ سرا نیم دراج ھشکیں نان ءُ چاہ وران اَت…. چاریں نیمگا کتاب ءُ کاگد کپتگ اِت انت…مارا پلنگ ءِ سرا وتی کش ءَ جاہ ئے دات…. آ روچی استاد ءِ گوما باز گپ بوت…. آ نہ تہنا منی کماش بلکیں منی پیروک "جمعہ کامریڈ” ءِ ھم ھمراہ بوتگ اَت…. منی پیروک ءِ یاتاں کپت , کتابانی قصہ دراتک , سیاست ءُ ھاس اکبر بگٹی ءِ تندیں بیانانی سرا چمشانک ئے دات…. بلوچستان ءِ جاورانی بدل بوگ ءِ ھیال ئے ھم پدر کت….آ وھدی لیاری دنیگا "لالا کلچر” ءِ آماچ نہ ات….

منا جست ئے گپت کہ تو گیشتر چے وانے؟؟

"سیاست ءُ فلسفہ”….

سرئے سرینت ءُ پدا جستے چگل ئے دات "ءُ لبزانک؟؟”….

من سر ناں ءَ سرینت…..

داں دیر ءَ ما پاد اتک درکپتیں…..دومی روچ ءَ من پدا شتاں , اے رندی رزاق سربازی ءُ راشد سربازی دویں منی ھمراہ اتاں….رزاق ءِ گوما استاد سک نزیک ات….من رزاق گوشت "یار کتابے پچ گر بدے”….رزاق ءَ استاد گوشت کہ بچک کتاب لوٹی….بزیں بروتانی چیرا بچکندے رژنا بوت "کجام کتاب؟”

"مارکسی فلسفہ اور جدید سائنس” من زوت زوت الماری ءِ نیمگا دست ٹال کت ءُ جواب ترّینت….

بچکند ءِ رژناھی گیشتر بوت….پاد اتک الماری یے پچ کت دگہ کتابے کشت ئے "تو بیٹا پیسرا ایشی ءَ وان , آئی ءَ ترا دیاں بلے پیسرا ایشی ءَ وان”….

من کتاب چارات…..”مادام بواری”

منا سک بداتک بلے ھچ نہ گوشت….

شپ ءَ کتاب وانگ بندات کت….یکے شپ ءَ ھلاس ھم کت , دومی روچ ءَ پدا استادے گورا شتاں….بس چہ ھمدا منا لبزانک ءِ نادراھی ءَ گپت….آنناکارینینا , جنگ و امن , گاڈفادر , کرامازوف برادرز , جرم و سزا , بالزاک , کنڈیرا , کافکا , سارتر , کامیو , گارسیا , نجیب محفوظ , ھائزش بول ءُ باریں کئے کئے , استاد ءَ گوں لبزانک ءَ منا ششت ءُ تاپ دات….چوں نہ ات منا لبزانک ءِ گوما ھب نیست اَت بلے آ وھدی من تھنا اردو شاعری ءِ وانوک اتاں آ ھم منی اردو ءِ استاد ءُ منی زند ءِ یک دگہ براھداریں کارست ماسٹر ندیم قریشی ءِ ھیر برکت ءَ……

آزاد ءِ دنیا یک نوکیں جہان اَت , یک ابکّہ کنوکیں جہان…..استاد ءِ زنڈیں اصول اَت , کتاب بر , وان , پدا بیا گپ بکن….وت کم گپ ئے جت دومی ءِ گیشتر گوش ئے داشت….

ھمے نیام ءَ روتاک "توار” مئے گورا اتک , استاد ءِ سکین ءُ رزاق سربازی ءِ دلبڈّی ءَ من آرٹیکل نبیسّگ بندات کت….اولی آرٹیکل ءِ سرا استاد ءَ منی گبّ چُکّ اِت انت , اے منی انعام اَت , یک مزنیں ءُ بے بہائیں انعام…..منی آرٹیکل ءِ انچو تعریف ئے کت کہ من جزم بوتاں نی من نبشتہ کارے باں…..

آئی ءَ منا گل خان نصیر وانگ ءِ سکین دات , بقول واجہ ءِ : "بلوچ ءِ سرا نبیسّگ ءَ پیسر "بلوچ” ءَ بزان , بلوچ ءِ زانگ ءِ راہ بلوچی کلاسیک شاعری انت” اے پنت داں مروچی من بیھال نہ کتگ…..

واجہ آزاد واقعی "آزاد” اَت….علم دیگ ءِ دز مز گرگ ءِ جاہ ءَ مارا برے کافی , برے چاہ ءُ برے ھیک پراٹھ وارینت ئے….آزاد ءِ لوگ ھم آزاد ات , آئی ءِ لوگ منی لوگ , بچک برات , جنک ءُ نشار گھار جوڑ بوت انت….

ھرچ بنگپ ءِ سرا گپ کنگ ءِ آجوئی اَت , سوال بکن , تران بکن , نگد بکن , انکار بکن , استاد ءِ بچکند برجاہ انت…..

آئی ءَ مارا اردو ترقی پسندانی گورا برت , اجمل کمال , توصیف احمد , پرویز ھود بھائی , ڈاکٹر مبارک علی , حمزہ علوی , فہمیدہ ریاض ءُ باریں کئے کئے….مئے پجار چوش ئے کت "اے مئے ورنا انت , باز سرپدیں ءُ زانتکاریں ورنا”…..

استاد ءِ دلبڈی ءُ رھشونی ءَ مارا انچوش کت ما وت لیاری ءَ دیوان کتیں , ڈاکٹر مبارک علی دعوت کت , واجہ اتک گپ ئے کت….ما علمی ءُ پگری دیوانانی سلسلہ بندات کتیں….رزاق سربازی , راشد سربازی , زبیر سعید , وسیم , سرفراز , حاجی رزاق….استاد ءَ منا سنگت ھم بے مٹ ءُ بے دروریں داتگ ات…..

آزاد ءِ یک کمال ایش ات , ترا کجام ھم بنگپ ءِ سرا کتاب لوٹ ایت تہنا بنگپ ءَ بگوش کتابانی لڑ ءَ آزاد دنت….سیاست , چاگرد , تاریخ ءُ لبزانک اے آئی ءِ ھاسیں پڑ انت , اے بنگپانی سرا گپ کنگ ءَ وھدے بندات کنت گڑا ھلاس بوگ ءِ نام نیست , زانت ءِ مروارد انت کہ رچنت….استاد ءِ پتینک ءَ ھرچی ھست اَت ٹرانسفر ئے کت , نہ زانت ءِ غرور ءُ نہ وتا مزن لیکگ , مئے رنگیں ھچ مزانت ھم آئی ءَ شہ زانت ھساب کتگ اَنت ءُ ھچ جاہ مئے دل ءَ وتی مزنی ءِ مارشت ئے پیداک نہ کت…..آ استاد ات بلے سنگت ات , ھمراہ ات….رھشون ات بلے دیما نہ ات , ھوار ات….

مروچی پنچ سال انت , من استاد نہ دیستگ , نزاناں چون بیت ءُ کجا انت….

دوشی من واب ءِ تہا استاد دیست….

استادے لوگ ءِ شوھاز ءَ من گار باں داں درئے گیجاں ءُ وتا رسیناں….بچکے در کئیت نزاناں کئے انت , گوش ایت "تئی استاد ءِ ھاسیں اوتاگ مروچاں ادا نہ انت بریں ترا آئی ءِ گورا براں”…..موٹر سائیکل نزاناں کجام دمکاں ترایت , داں یک لوگے ءِ دیما اوشت ایت…..لوگ ءَ رحیم بخش آزاد نندوک ات , بزیں بروت , مزنیں قد ءُ بالاد…… آ منی گندگ ءِ گوما گوں بچکند گوش ایت "زلفی تو سک دیر کت”…..

استاد تو ھست ءُ سلامت باتے , من دیر نہ کتگ , ما دائم تئی ھمراہ آں , تئی داتگیں مروارد دنیگا پہ منا رھشون اَنت….وشّیانی منگیر باتے…..شالا کتاب بھر کناتے….

Facebook Comments
(Visited 17 times, 1 visits today)

متعلق ذوالفقار علی زلفی

ذوالفقار علی زلفی کل وقتی سیاسی و صحافتی کارکن ہیں۔ تحریر ان کا پیشہ نہیں، شوق ہے۔ فلم نگاری اور بالخصوص ہندی فلم نگاری ان کی دلچسپی کا خاص موضوع ہے۔