مرکزی صفحہ / براہوئی / براہوئی میڈیا نا شش سال

براہوئی میڈیا نا شش سال

نوشتہ : عبدالحیات منصور براہوئی
براہوئی میڈیا نا مچا ٹیم اے brahvimedia.net نا شش سال پورو مننگ آ مبارک باد پیش کیوہ۔ ہرا نا مچھا ٹیم اول دے آن براہوئی نا خیر خواہ تون فون ؤ ایلو ذریعہ تا کمک اٹ تینا اواری ؤ خڑکی نا درشانی اے کریسا بسونے۔ ہرافک اسہ اندھنو جائس تولیرہ ہراڑے براہوئی ہیت کروکاک مستونگ ؤ دھننگا جاگہ غا تا مون ٹی نت ٹی بے ئنا کچ اریر ولے اوفتے تینا زبان ؤ مخلوق کن ہراسہ درد ؤ ہراسہ مہرؤ مہبت اس ارے اوفتے دھن بیقرار کرینے کہ اوفک تینا غریبی ؤ دو ئنا پوریا نا باوجوددا گڑائے کس ءِ آ پاش کتنو ؤ کسے دا احساس تتنو کہ ای اسہ غریب ؤ بندغ سینا باوجود تینا لمئی آ زبان کن داخہ در مہرؤ خذمت کیوہ۔اوفک داکان باوجود تینا قیمتی آ وخت آن وخت کشسہ تینا زبان اے ایلو دنیا نا زبان تے تو ہمسر ؤ بریبر ہتنگ کن تینا مچا لائخی، ہنر ؤ علمی صلاحیت آتیان کاریم ہلنگ کن تینے گاہس پد توتنو ہرافک ہر براہوئی نا چھناڑکن اسہ اندھنو مثال ئس اریر کہ اوفتیان تینا زبان اے مستی دننگ ؤ ترقی ؤ شون تننگ کن بندغ صلاح ؤ مشورہ ہلے بلکہ اوفتا لائخی ؤ اوفتا بجربہ غاتیان فائدہ ہلیسہ مونا برے۔brahvimedia.netاے ای مدام خنیوہ کہ اپ ڈیٹ مریسہ بسونے وا اوناخوانوکاتا کچ ؤ کیل ٹی ہر سال پین ودیکی مرسہ ہنانے انتئے کہ اوفتا کاریم آن ننا ورناک بھاز مطمئن خننگرہ ؤ تینا زبان نا باروٹ اوفک دلجاء اریر میڈیا نا سنگت آک ہراسہ اواری ؤ لائخی اٹ تینا مسخت ؤ مزل نا کنڈا روان اریر اسہ دے ئس اوفک ضرور تینا است نا مزل ؤ مراد آتے دوئی کرور براہوئی زبان ؤ ادب نا نیٹ آ بننگ اسہ آسان ؤ ہیتس اف کہ ہراانتئے بھلو سرمایہ ؤ رقم خوائک۔نن خنینہ کہ دا ٹیم ئتو دنو بھلو سرمایہ ئس یم افاوفک تینا ہستی ءِ تینا ایلم تا مونا تخسہ تینا زبان کن مخے تفینو۔براہوئی میڈیابراہوئی نا پنی آاخبار ہڑدے ئی ؤ ہفتئی آ تلار اے مدام تینا وختا اونا قاری تیا سر کننگ ٹی ہچو کمی ؤ سستی ہشان تتنے ۔داڑکن اونا ٹیم لکھ مبارک کڑزک۔داتم اسکان اونا چندی ممبر آک اریر اسہ پٹ ؤ پول سینا ردٹ 87 مریرہ۔ہرافتیٹی دے پدے آن ودیکی مرسہ ہننگ اے۔براہوئی میڈیا ٹی ہر وڑئنا گچینا معیاری آ اردو ؤ انگریزی ؤ بلوچی ؤ براہوئی کتاب آک آن لائن آسانی ئٹ خواننگ کن دوئی بریرہ نن خنینہ کہ دے ئس براہوئی میڈیا نا کاریمک بھاز مخلوق ٹی مقبول مرسہ پن خنار گڑا اونا چندی ادبی ؤ اشاعتی ادارہ غاک بھلو است کشی ؤ است نا حب ئٹ تینا شائع مروکا کتاب آتے براہوئی میڈیا اسکان سر کننگ ٹی تمار۔براہوئی میڈیا نا آن لائن اسہ بھاز بھلو لائبریری ئس ارے ہراد ے شوقین آک ہر وقت بریرہ ہریرہ ہراڑان تینا علمی ملاسی ءِ مرکیرہ۔ایہن ادارہ نا پن براہوئی میڈیا اے ولے ہرا براہوئی زبان اے بھلو زبان تے تو ہم سیال کننگ کن ایلو زبان تا کتاب آتے ہم جاگہ تسونے ہراڑان ننا زبان ایلو زبان آتون خڑک مننگ ٹی آسانی خنک۔اندن سازجاہ نا ردٹ گچینا شعر پاروکاتا توار ئٹ جوانو جوانو شعر بننگ کن براہوئی میڈیا نا کمک ئٹ نیٹ آ ساڑی ارے ہرادے ہرانا شوقین آک بھاز شوق ئٹ پسند کرسہ بنرہ ہراڑان براہوئی زبان ءُ ادب ؤ تہذیب ؤ ثقافت نا بیرہ رکھ مریک بلکہ پین مستی ترقی کریسہ شون ہلیک ؤ ہر اسہ خوف ؤ خولیس ؤ گڑتی تے داسہ نا دانشور آک براہوئی کن یونسکو نا رپورٹ آتیا ہرسہ مونا ہیسنو دا کاریم تا ردٹ ہمو مچھا خدشہ غاک دانگ اینگ مریسہ کارہ چٹ مریرہ۔ننا دعا اے کہ براہوئی میڈیا پین شون ہلےءُ براہوئی زبان کن پین زیات جوانو کاریم کریسہ تینا زبان اے ترقی تریسہ اسہ گچینو مقام ءُ ہند ئسے آ سر کے۔آمین

Facebook Comments
(Visited 20 times, 1 visits today)

متعلق براہوی حال حوال

براہوی حال حوال