مرکزی صفحہ / براہوئی / براہوئی میڈیاانت کرینے انت کننگ ءِ؟

براہوئی میڈیاانت کرینے انت کننگ ءِ؟

نوشتکار: ثناء اللہ مینگل
شش سال مست براہوئی زبان ناالیکٹرانک میڈیا ٹی نمائندگی ءِ کننگ کن نن ہراوخت انٹرنیٹ نا دنیا ٹی براہوئی میڈیا نا بناء اے کرین تو بھلومخلوق ئسے نا کنڈان ننے او ننا ٹیم ئنا بھاز تعریف مس ننے ایپریشیٹ کروکاک ننا حوصلہ ءُ جذبہ آتے بھاز کریر شش سال ہمر زو ہنا رسماہم تمنگ اف ۔ہر سال ئٹی 26نومبر نا دے براہوئی میڈیا نا پنٹ نن اسہ رپورٹ اس اتینہ کہ ننا ہرسال ئٹی کاریمک انت انت مسنو او مونی نن انت سوچانن؟ہرسال ننا رپورٹ اے نوشت کروکا خواجہ امداد جان ئس اوداواراونا گڑاس اختئی تہ سبب آن دارپورٹ ءِ ای نوشت کننگ ئٹ۔رپورٹ اے نوشت کن ہراوخت ای توسٹ تو سوچاٹ آخرانت نوشت کیو؟انٹرنیٹ نا دنیاٹی دا اولیکو براہوئی ویب سائٹ مرو ہراکہ شش سال پورومننگ آن پد ہم داسکان تینا کاریم تے برجاء تخانے بھاز آویب پیج آک جوڑ مسر ولے زوت بند ہم مَسُر۔داشش سال ئنا سفرٹی نن بھاز آ کاریم تے کرین ولے بھاز آ کاریمک اندنو ہم اسر ہرافتے ننے نیام ئٹی یلہ کروئی تما۔دنکہ براہوئی میڈیاآن لائن ایف ایم ریڈیو ہراکہ ننا وس آن پیشن تما دا سبب آن کہ نن تون مالی وسائل بھاز کم ئس او ارے ہم ۔ننا مخلوق او ننا ادارہ غاک سما اف انتئے داسکان سوشل میڈیاءُ انٹرنیٹ آن جوان وڑٹ فائدہ ہرفنگ کپسہ ۔پروفیشنل لیول آ بننگ آن پد بھاز آک بندغ آک ہندنو ہم اریر ہراکہ توئنا ہزارا پیسہ غاتے خرچ کرسہ تینا جند ئنازاتی آفیشل ویب پیج جوڑ کرفینو تاکہ مخلوق اسکان ننا پن جوان وڑٹ مونی کائے۔ولے ننا ادارہ غاک دا سہولت آتیان جوان وڑٹ فائدہ ہرفنگ افس ۔نن ہرا وخت آن لائن میگزین نا بناء اے کرین تو تعریف کروکاک بھاز اَسُر ولے میگزین اے مون مستی دروکاک کم اسر ہمومواد آک ملارہ ننے ہراکہ تلار ئٹی ءُ توار ئٹی ایلو پین ہم ادارہ غاتا پنہ آتیاملو آن چھاپ مسوسر۔متکنا مواد آتے خلسہ خلسہ آخر مواد آک کٹار ننے میگزین اے بند کروئی تماننا جند ئنا ہم سستیک ہسر ولے مخلوق نا ہم بیرہ تعریف کننگ آن پین اچو کمک اس الو سوائے منہ بندغ آن۔براہوئی میڈیا نا اسہ بلو سرسوبی اس دا مس کہ براہوئی میڈیا ناٹیم تلار اے انٹرنیٹ آ آن لائن کرے براہوئی زبان نا اولیکو ہردے ئی اخبار او ہفتئی اخبار ہم براہوئی میڈیا ناپیج آ آن لائن خواننگ مریک۔امر کے براہوئی میڈیا وعدہ کریسس کہ اسہ آن لائن ساز ءُ زیمل نا ویب سائٹ ئس ملون براہوئی میڈیا نا ٹیم تینا دا وعدہ اے پورو کرسہ بلوچ ٹیک نا ٹیم تون اوار ساز جاہ نا پنٹ اسہ ویب سائٹ ئسے نا بناء اے کرے ہراٹی براہوئی ءُ بلوچی زبان نا گلوکار آتا شعر ءُ باگل آک دوئی مریرہ ۔دا وخت آ سازجاہ ٹی 30 آن زیات براہوئی گلوکار آتا بھاز آ البم آک تخوکو۔اندن دا نمبر دے پدے آن مون مستی ہنسہ ءِ ۔داکان بیدس ننا زبان نا بھاز آ ویل آ اریر ہرافتیٹی ننا اسہ بھلوویل ئس آن لائن ڈکشنری ناہم ارے دا بابت ئٹ ہم ننا ٹیم ئنا سنگت آک بھاز محنت کریر اسہ آن لائن سسٹم اس جوڑ کننگا ہراٹی انگلش ٹی اسہ لوز ئس لکھاسہ ءُ براہوئی ٹی معنی اے تہ مونہ ایسکا۔ولے دا کاریم ہم بیرہ اسہ بندغ نا کاریم ئس الو وا ہم نن کوشست کرین کہ دا کاریم اے زو مونا دین ولے گڑاس ٹیکنیکل مسلۂ آتا سبب آن ننا بھلو موا د ئس ننے آن ہنا براہوئی میڈیا نا غٹ مواد آک ڈلیٹ مسر ہرانا سبب دا اس کہ ہرا سرور آ نن ہوسٹنگ کریسن ہموکریش مسوسس غٹ مواد آک ہنارکتاب آک ہم۔براہوئی میڈیا ٹی دا وخت 50 کتاب ئس آن لائن خواننگ کن تخوک اریر ءُ پین ہم بھاز آ کتاب آک دا وخت تخوکوہراکہ گڑاس مسائل آتا سبب آن براہوئی میڈیا ٹی بننگ افس براہوئی میڈیا نا گڑاس ٹیکنیکل مسلۂ اریرہراڑکن مالی وسائل نابھازگرج ءِ گڑاس ادارہ آتیان خواست کرینن او دا مسلۂ آتے ہم مونا ایسنن امید ءِ اوفک دا مسلۂ ٹی ننا کمک اے کرور۔کلان بھلا خواری ننے کتاب آتیان مس او کلان بھلو فائدہ ئس ہم ننے کتاب آتیان بس۔فائدہ دا مس کہ براہوئی زبان نا کتاب آک بیرہ منہ شار آن ایلو کس ءِ سر متوسہ او مفسہ ہم داسکان ولے براہوئی میڈیاناسبب آن بھاز آ مخلوق آک کتاب آتے دوئی کریر پیشن ملک ئنا سنگت آک ہم دا سہولت آن بھاز فائدہ ہرفیر۔ادبی ادارہ غاک ایلو کتاب نوشت کروکا خواجہ غاک دا حوالہ ئٹ نن تو بھاز کمک کریر او کتاب راہی کرسہ کریر کتاب آک ہراوخت ننے ملارہ تو اوفتے اسکین کننگ کن 3 دے 4دے ہم لگاکہ اسکین گننگ آن پد ہر کتاب نا پیج آتے برابر کننگ او دافتے پی ڈی ایف کننگ آن پد دا اپلوڈمسرہ بے حدخواری ئس ہرا سنگت اے پاریسہ کہ ننے انپیج فائل یا پی ڈی ایف راہی کبو تو منع کریرہ کہ افک ۔بیرہ منہ ٹیکنیکل بندغ آتا مہربانی ئس او ارے ہراکہ کتاب آتا فائل آتے تینتو تخانواو ننے منہ کتاب راہی کریر ولے زیات تر کتاب آتے اسکین کننگ آن پد نن براہوئی میڈیاٹی اپلوڈ کرینن ہراوخت کہ ننا سرور کریش مس مواد آک ہنار تو کتاب آک ہم ننے آن بھاز آ ہنار اوفک ریکور ہم مننگ کتوس گڑاس کتاب ننے ملار بھاز آک ہنار کنے بھاز افسوز بس کہ نن داخہ محنت کرین اوکان پد ہم داسہ بھاز آسنگت آک پارہ کہ ننا کتاب آک براہوئی میڈیا ٹی مالو اسر داسہ افس اوفتے بھاز سمجھائیفین کہ ننا مواد آک ہنانو وا ہم یقین کپسہ ہراڑان کنا است بھاز خرین مس کہ نن داخہ محنت کرین وا ہم کس پو مفک۔خیر گلہ کروکاتے اللہ خوش تخے انشاء اللہ کتاب آک مونی ہم برسہ کرور۔فنڈ الوکا ادارہ غاتا کنڈان بیرہ ننے کتاب آتا کمک مسنے او ننے بیرہ کتاب ٹیکی کرینو ہرافتیکن نن اوفتا منتوار ئن ولے ننے مالی کمک اینو اسکان کس کتنے اگہ مالی کمک مسکہ تو دا کاریم جوان وڑٹ مونی ہم ہننگ کریکہ دا وخت براہوئی میڈیا نا ٹیم سوچانے براہوئی لوز گنج ئس مونا ہتنگ نا ہرانا کاریم جاری اے انشاء اللہ زوت مونہ ہتون تہ ۔اومیت اے دا حوالہ ئٹ ادبی ادارہ او ادبی سنگت آک نن تو کمک کرور۔

Facebook Comments
(Visited 38 times, 1 visits today)

متعلق براہوی حال حوال

براہوی حال حوال