مرکزی صفحہ / براہوئی / دیگ دان ٹی خزانہ ئس

دیگ دان ٹی خزانہ ئس

اُردوادب آن
براہوئی بدل: قاسم نازبلوچ

اسہ خلق اسیٹی اسہ بزغر ئس اسکہ او بیچارہ بھاز بے کچ محنت وخواری کریکہ اونا گزران بھاز مشکل اٹی مسکہ او دے ونن محنت کریکہ سادہ او زندغانی ئس گدریفیکہ اوڑن باوجود اوڑکن دیخرو ام بچت ئس متوکہ کل خڑچ مسورہ او تینا کل زندغانی اے محنت اٹی گدریفے ولے ہچ غریبی اودے الیتو:
اسہ دے او سُہب نا نماز اے خوانہ تودعا کریسہ تینا دوتے بڑز کرے امو وخت اودے تینا غریبی یات بس تو اونا خنتیان خڑینک آک ریڑکریر او بھاز اورے اسکان اوغا اللہ نا مونا پریات کرے
او پارے” اے اللہ دا دنیا ٹی ہرکس اے انت ئس رسینگک نا حکم اٹی رسینگک اے اللہ نی کنا رزخ تروک ئُس ای نے آن سوج سوال کیوہ کنے کنا دیگ دان ٹی رزخ و لوت اِیت تاکہ ای تینا زند نا منہ وخت آرام و آسودہ اٹی تیر کیو”
نماز آن گُڈ او تینا بزغری نا نیما غے ملک اتکن ہنا کاریم کرے.کاریم ٹی اونا پچ اتیٹی کوٹور اس آڑینگا اونہ پچاک مچے ارنگار اوپارے دا کوٹورے ماسن کشیو تاکہ پدی نسخان ئس تف کنے.او ارفے دادے ماسن کشکا تو ڈغار ٹی کڈ اسہ گڑو ئس خنا زو زو گڑو نا باے ہرفے چٹ فریشان مس گڑو خیس وزراتاسکہ آن پر اس!
او دفتے خنا بھاز خوش مس پدی سوچ اٹی تما.او تینتو پارے” اخہ اخہ دا کنا افئس دا دلوت اے اللہ کنکن رادہ کتنے او پارے ای تینا اللہ غان تینا دیگ دان ٹی خواہسوسٹ تینا ملک وکشار اتیٹی خواہتوسٹ ”
داسوچ تون اوہمو خزانہ اے پدی ہمو جاغہ آ کڈ کرے و اُراکن بس اوتینا دا غٹ قصہ اے تینا زاہیفہ اے پارے
اونا زاہیفہ اونا ہیتاتے بنگ تینا اَرِغ نا بے عقلی آ بس غصہ ٹی بس اوڑا جوان چَڑاکہ دوئنا دلوت ءِ احمخی ٹی پدی مِش تا کریس او تینا ررغ تو جنگ لگا پارے ان پدی زو ہمو گڑو اے اُراغا اَت ولے امبل اسٹ آ سلیس انتو اتوتا او چڑا آندن پاریکہ ای تینا اللہ غان تینا دیگ دان ٹی خواہسوسٹ تینا ملک وکشار اتیٹی خواہتوسٹ!
آخر شام مس بزغر خاچا تو اونا زاہیفہ انا تینا ہمسائے سینا اُراغے اوفتے تینا ررغ نا بے عقلی نا کل قصہ اے پارے اوفتا ہمسائے نا بزغر نا زاہیفہ تون اندا اقرار مس کہ ای نے جاغہ نا پاوا نی در کش تہ نیمہ نا نیمہ کنا اندا فیصلہ مس پدی بزغر نا زاہیفہ ہنا اراکن خاچا.
پگہ کہ اندا ہمسائے تا انا امو جاغہ اے سر مس ختنگ اے شروع کرے.مچٹس ختا امو گڑو اے خنا او خوشی ان زو زو گڑو نا
با اے ہرفے ملا تو گڑو ٹی خزانہ نا سکہ تا بدل گڑو دوشہ آن پراس! او واپس زو زو گڑو نا بائے بند کرے او اندا سوچا کہ دا بزغر نا زاہیفہ نا کنتو دُرو کرینے کنے دغا تسونے. تینتون پارے جوان ای ام دانیاڑی ءِ اندنو سبخ ئس تروٹ کہ زند مچ یات کے اگہ زندہ بچا تو !
اوپدی سنبھال اٹ اندا گڑواے ارفے اُراغا تینا ایس شام تو نن نیما غا او گڑو اے ارفے ہنا بزغر نا اُراغااوفتا دیگ دان ٹی دیگ ءِ تخا وتینااراکن اندا خیال ٹی بس کہ دانیاڑی سُہب کن بش مس ضرور دیگ ءِ صاف کیک کہ چاہ ئس کے تو اودیگ ءِ خنک وختس دیگ ءِ ملا تو اودے دوشاغاک ڈنگ خلیرہ او کہک!”
ولے سُہب تو بزغر نا جند بش مس ہنا کہ وضو کہ دیر باسفیو او دیگ دان ٹی ہمو گڑو اے خناملا ہُراتاگڑو خیسن وزرناسکہ آن پر اس!
تو او یخنگا دیتٹ زو زو وضو کرے سجدہ غے تما پارے "اے اللہ نا لک لک منتوار آٹ نا لک لک شکر اے ادا کیوا نی کنا دعا اے قبول کریس کنا اُراٹی کنے دلوت تسوس”

Facebook Comments
(Visited 44 times, 1 visits today)

متعلق براہوی حال حوال

براہوی حال حوال