مرکزی صفحہ / براہوئی / شہزاد غنی نا”دستار” تنقیدی جاچ ئس

شہزاد غنی نا”دستار” تنقیدی جاچ ئس

گڈیکو بشخ
نوشت : عمران فریق
شہزاد غنی صاحب براہوئی زبان نا اَسہ باز گچین او شاعر ءُ اَدیب ئَسے. اونا شاعری نا کتاب آک تینٹ تینا مٹ او. داکان مُست اونا اَسہ ناول ئَس ” شتکو” نا پنٹ ھم مارکیٹ آ بسونے. اِی شہزاد غنی صاحب نا اِرٹمی ناول
” دستار ” نا زی آ بیرہ گپ کیوا او اوڑن مُست فقط دا پاننگ خواوہ کہ شہزاد صاحب نا اولی ناول، ناول نا خواست آتیان ءُ باز اِنگا کمبوتی تیان جوانو ناول ئَس مننگ کتو. ہرانا سپورٹ ئَٹی انجم براہوئی صاحب پاہک
” اونا اولیکو ناول ” شتکو” بیرہ براہوئی ئے اَسہ ناول ئَس تننگ نا اُست خواہی تا برام ئَس. ہندا وجہ ئے کہ ” شتکو” تینا تِہ ٹی بھاز آ کمبوتی تے جاگہ ترسا شینک مَس”.
داسہ شہزاد غنی نا اِراٹمی ناول
” دستار” ہراکہ ۲۰۱۶ نا شینک مروک ئَسے. دا کتاب ءِ ای مَنہ دے مُست علاقہ آن بٹنگفیٹ کہ اَسہ ناول ئَسے نا بلکہ جوانو براہوئی ناول ئَسے نا خواننگ نا سعادت ملے. دا ناول ءِ خواننگ آن گڈ کنا زہن ئَٹی ہزار آ سوال آک ودی مَسُّر. دا سوال آتے کننگ آن اِی زر ئَس خوف ھم کیوا ھَرا نا سبب دادے کہ دُن مف کنا ھِیت آک پین رنگ اَلور. او اِیلو گپ دادے اِی دستار نا زی آ نوشت ئَس نوشتہ کننگ ئُٹ تو باہدے تینا کل ھِیتاتے صاف صاف کیو.
گپ دا کہ اِی دا ناول نا زی آ باز ھیت کننگ کپرہ اِی تفصیلی وَڑ ئَٹ نمے ءُ دا ناول ءِ کانیکٹ کننگ کپرہ. وجہ دادے کہ دا ناول تینٹ تینا زی آ کس ءِ باز ھِیت کننگ اَکن اِلپک.
اراٹمی گپ دادے کہ ناول نا قصہ اَسہ باز مُتکن او سکرپٹ ئَسے ھَراڑا داڑن مُست ھم باز آ افسانہ غاک نوشتہ مسونو ولے دا گڑا غا نن تنقید کننگ کپہ نا انتیکن ننا راج داسکان تینٹ اَندا گڑاتیان مُر متانے تو راج ئَنا اَدیب ھراکا مُر مرے. او داڑتون اوار نن ناول نا قصہ نا مُتکنی او پُسکنی دا وجہ غان ھم تنقید کپہ نا کہ دنیا نا اکثر قصہ غاک اَمو مُست ئَنا قصہ غاکو بس بیان کننگ نا طریقہ جتا مریک. دنکہ سیف صاحب پاہک

صرف انداز بیاں رنگ بدل دیتا ہے
ورنہ دنیا میں کوئی بات نئی بات نہیں

شہزاد غنی صاحب نا اَگہ نن قصہ غان زر ئَس مُر مرین تو اولی سوال دا ودی مریک کہ دا ناول ھَرادے شہزاد غنی صاحب، ڈاکٹر اِیم صلاح الدین مینگل صاحب، نادر شاہوانی صاحب ءُ انجم براہوئی صاحب ” ناول ” پارینو دا ھَرا پہلو ئَٹ ھرا حساب ئَٹ دادے ناول ئَس پارینو داڑا کنا کاٹم داسکان تمپک. اِی دا ناول ءِ چار وار مکمل خواناٹ او ھَرا وار اَندا سُوج بساکہ کہ دا چار بندغ دا قصہ ءِ ناول ئَس پارینو اَسہ سبب ئَس تو مرو اَسہ زاویہ ئَس مرو ھَراڑن دا ناول نا چہرہ ءِ اِیتو ولے اِی بے سوب مَسُّٹ. اِی ناکام مسٹ دا قصہ ءِ ناول نا پن تننگ آ. شہزاد صاحب نا دا ناول ئَٹی بیرہ اَسہ قصہ ئَس بیان مسونے داکان بیدس داٹی نا پلاٹ ئَس ھرے نہ مکالمہ ھَرے نہ دا ٹی ناول نگاری نا ڈس مِلک نہ کہ کردار آک تینا کرد ءِ ادا کرینو نہ کہ فنکاری نظر بریک.
اَگہ دا قصہ مچ ءِ ھم فکشن نا وَڑ ئَٹ بیان مروس تو اِی دم ئَسے کن مناٹہ کہ دا ناول ئَسے. اَگہ شہزدا صاحب او اِیلُم آتیکن دا ناول ئَسے تو اوفتیکن دنیا نا کل ” سفرنامہ غاک ” ھم ناول مرور. اَگہ نن ناول نا اِیلو خواست آتیان مُر مرسہ دانا کچ آ ھِیت کین تو
دا ناول کنا خنٹی ناول آن زیات "Novella” ئَس پاننگ مَساکہ اگہ ایلو ضرورت آک داٹی دیخس ھم ساڑی مروسُر.
ھا، دا ناول اَسہ جوانو اَفسانہ ئَس مننگ کرہکا اگہ اونا زی آ جوانی ئَٹ کاریم مروسُس. شہزاد غنی صاحب قصہ ءِ ھم بے ترتیب وَڑ ئَٹ بیان کرینے. اَسہ سین ئَس داکا کٹک اِیلو سین اَندنو جاگہ سے آن بنا مریک کہ ھڑتوماتا نیام ئَٹ اِچ او ربط ئَس خننگپک. کردار آتا نیام ئَٹ مکالمہ اول تو اِچ اَف نا کچ ئَٹی ءِ اَگہ ھَرے ھم تو فنی حساب ئَٹ ملپک. منظرنگاری نا گند ھم ملپک. اَسہ اِرا جاگہ اَگہ ھَرے ھم تو غیر ضروری. او دا ناول نا خواننگ نا وخت آ اندن معلوم مریک کہ ناول نگار بس زو زو ناول ءِ ختم کننگ ئَنا کوشست ئَٹی مسونے. او یقینن دا ناول آ اِرا تُو ھم لگتانے اندن ناول تینٹ پاہک. اَسہ جوان اِنگا ناول کن دا ساڑی آ اَختہ اِنگا وخت ئَٹی ھم ناول نگار ءِ منہ سال درکار مریک ولے اَرمان.
دستار ئَٹی ناول نگار شہزاد صاحب اول آن آخر اِسکان اَسہ کاریم ئَس کرینے بیرہ اَسہ کاریم ئَس او تینا کردار آتیٹ ھم اَندا گڑا ءِ کرفینے ھَرا ” پنت ءُ نصیحت ” ءِ. جاگہ ئَس جندتا قصہ نا نیام ئَٹ ساڑی مریک او قاری تے نصیحت کیک جاگہ ئَس کردار آتیٹ تینا پیغام ءِ ترفک.
آخری گپ دادے کہ کنکن ” دستار” فقط اَسہ اَرمان ئَسے کہ شہزاد غنی صاحب ننے ولدہ اَسہ ناول ئَس تننگ کتو ولے دا گڑا غان نن اِنکاری مننگ کپہ نا کہ شہزاد صاحب تینا علم ءُ معلومات ئَنا مطابق تینا وَس ئَنا کچ ننا زبان ءُ اَدب ئَنا خذمت ئَکن خواری کرینے دا راج اَکن تینا وخت ءِ تسونے. او ننے اُمید ءِ او مُون مُستی ھم تینا خذمت آتے تینا کاوش آتے برجا تِخو. او زو تان زو ننے اَسہ باز اَعلی او گچین او ناول ئَس اِیتو. شہزاد غنی نا زندگی کن دعا گو اٹ:

Facebook Comments
(Visited 45 times, 1 visits today)

متعلق براہوی حال حوال

براہوی حال حوال