مرکزی صفحہ / براہوئی / معاشرہ, شونداری نا عمل و فیڈ بیک !!

معاشرہ, شونداری نا عمل و فیڈ بیک !!

.
نوشت . سعید نور
.
چائندار آتا پاننگ نا رد اٹ مچ دنیا نا معاشرہ غاک 3 بشخ اٹی او ہرا ٹی کل ان اولیکو”روایتی معاشرہ’ ارٹمیکو عبوری’ و مسٹمیکو جدید معاشرہ ء ":
.
روایتی معاشرہ ءِ قبائلی معاشرہ ہم پاننگک دا نا باتیک زند انا جدیدیعنی پوسکنا آسراتی و آسودگی تیان محروم مریرا و دا قبائلی معاشرہ ٹی پوسکن انگا تہذیب نا ہچو ڈس ئس سر مننگ کپک اوفک پوسکن انگا تہذیب آن نا بلد مریرا ہندن دا ہم پاننگک کہ ساڑی وخت اٹ روایتی معاشرہ ہچو جاگہ ئس ساڑی اف. ایہُن تو افریقہ نا جنگل آتیٹ زند ءِ تیر کروکاک قبائلی/روایتی پاننگرہ ولے اوفتے ہم روایتی معاشرہ نا پن تننگ پک دانا وجہ دادے کہ اوڑے ہم گڑا نا گڑا ئس شونداری/بدلی بسونے اوفک داسہ خل تیٹی شکار کننگ نا جاگہ غا تینا جوڑ کروکو ہتھیار استعمال کیرا .
روایتی معاشرہ ہرادے معاشرہ نا بنائی وڑ ہم پاننگک اونا بارو اٹ Pyeنا پاننگے کہ معاشرہ ٹی خواننگ نا تناسب اسل کم مریک و داٹی اسٹ ایلو نا با آن مون مقابل کروکا ہیت آتا کمک اٹ کلہو سر کننگ نا طریقہ مریک .زبانی ابلاغ زیات مریک. مطلب دا معاشرہ ٹی کلہو سر کروکا او بنوکا تیکن خواننگ المی اف. خوانپرنگ نا وجہ غان دا معاشرہ تینا مست انا اقدار آتے اِلنگ ءِ تینا بے عزتی سرپند مریک دا معاشرہ کن اخبار باز کم شینک مریک و اخبار خوانوکاتا تناسب زیات ان زیات 3فیصد مریک.
روایتی معاشرہ نا المیہ دا دے کہ داٹی کلہو(پیغام) نا جوابی ردعمل ہچ مفک و کہلو نا حد و ویل کم مریک.
.
معاشرہ نا ہرا کہ ارٹمیکو وڑ ءِ اودے عبوری معاشرہ پاننگک یعنی ہرا وخت کہ روایتی معاشرہ نا باتیک جدیدیت ءِ دوئی کریر تو روایتی معاشرہ نا زوال بریک و عبوری معاشرہ جوڑ مریک. عبوری معاشرہ جدید و روایتی نا نیامیکو وڑ ءِ . دا ٹی مخلوق شار تا پارہ غا کائک و علم دوئی کیک ہندا وجہ غان اونا خواننگ نا تناسب گیشر مریک. دا معاشرہ ٹی اخبار زیات شینک مریک ہندن اوفک ملکی حالیت نا جاچ ءِ الیرا و حالیت آتا بارو اٹ سوچنگ آ مجبور مریرا. دا معاشرہ ٹی کلہو (پیغام) سر کننگ کن ریڈیو, ٹی وی و اخبار دا کل انا کمک ءِ النگک و داٹی راۓ عامہ نا گرج مریک .
عبوری معاشرہ نا باتیک ہرا کلہو ءِ بنیرا اوڑان گڈ راۓ کن تینا کماش و کسر شون آتا کمک ءِ الیرا.
.
ہندن مسٹمی یعنی جدید معاشرہ ٹی زند تیر کروکا بندغ اتا خواننگ نا کچ 100 فی صد مریک ہندا وجہ غان داٹی پریس نا آجوئی, اجتماعی آجوئی ءِ تینا حق آتا کل آن اہم انگا بشخ سرپند مریرا.دا معاشرہ ٹی ہر 10 بندغ کن 1 اخبار ئس شینک مریک.
داٹی باز گچین وڑ اٹ جوابی رد عمل مریک و پٹ و پول آ جوان کاریم کننگک.
.
بڑز ہرا کہ معاشرہ غاتا ہیت گپ مس اوفتے ذہین تخنگے و دا سوج کننگے کہ نن دافتیٹ ہرا معاشرہ پاننگینہ؟
جدید ___ بلکل نہ …. انتئے کہ جدید اٹ تو تعلیم نا کچ 100 % مریک و دہ بندغ کن اسے اخبار ئس شینک مریک و نن 100 دۓ ان گڈ ہم دیچہ اخبار ئس خوانینہ کہ خوانپنہ.
.
انت نن عبوری معاشرہ ٹی ان _؟
داٹی ہم اخبار زیات شینک مریک و جوابی رد عمل ( feedback) مریک….انت ننے ٹی دا گڑا ہرے ؟
.
سلیس روایتی یا قبائلی معاشرہ… گو کہ اوٹی دا پاننگانے کہ ساڑی وخت اٹ ہچو معاشرہ ئس دا نا بشخ اف ولے اگہ غور کننگے تو ننا معاشرہ ءِ روایتی/قبائلی پاننگ آن بیدس پین آپشن ہم اف انتئے کہ نہ ننے ٹی فیڈ بیک نا رواج ہرے نہ کہ نن راۓ قائم کننگ کن تینا کسر شون تا کمک ءِ الینا و نہ ننے ٹی اخبار/نوشت خواننگ نا تناسب زیات ءِ بلکہ نن داسکہ زبانی ابلاغ نا کمک ءِ الینہ.
.
مطلب ننا معاشرہ ٹی اسے دا عیب ہم ہرے کہ ننا معاشرہ ٹی جوان انگا تخلیق/تحقیق کن ہچ ہم فیڈ بیک ئس بفک داڑان برعکس اگہ کس منفی پروپگینڈا ئس کے یا کس ئسے آ تینا ذاتی لار ءِ شولے تو فٹ کل انا فیڈ بیک اونا حق اٹ با زو بریک. ہرا نا منفی اثر دا مریک کہ پروپگینڈا کروکا نا حوصلہ افزائی مریک او تخلیق ان تمک و ہر وخت پروپگینڈا نا گواچی مریک . بیرہ پروپگینڈا ادب کن باز نقصاندہ مریک. دراصل feedback ابلاغ نا اسے اہم و بشخ ئسے ہندن ابلاغ ناعمل اٹ بنائی مآخذ وصول کروکا جوڑ مریک و بنائی کلہو وصول کروکا پوسکنا مآخذ جوڑ مریک. داڑان علم و چائنداری دوی مریک اوکان گڈ شونداری کن کسر جوڑ مریسہ کائک خواہ او ادب نا بابت مرے یا پین علم یا شعبہ ئسے نا بابت.
.
بائدے نن تینا معاشرہ ٹی شونداری اتنگ کن جدیدیت ء قبول کریسہ کان وخت ہراگڑا نا خواستے کیک نن بائدے بلا تعصب اوڑا عمل کین نوشت و خوان نا سلسلہ ءِ برجا تخن و تینا معاشرہ ٹی آئستہ آئستہ شونداری اتیسہ اودے عبوری ولدا جدید معاشرہ ٹی اوار کین گو کہ دا ہندنو کاریم ئسے ہراٹی وخت لگک ولے مشکل و کاریم ئس اف. داڑکن ننے بیرہ تینا رویہ غاتیٹ بدلی اتوئی ءِ ننے تعصب نا زمزیر تے کشکوئی ءِ اگہ نن دن کرین تو ننا ضمیر ننے دا جرت ایتو کہ کس انا تخلیق آ تینا جوابی رد عمل feedback ءِ درشان کرون . ننے ٹی اخبار/نوشت آتے خوانون اوفتا رد اٹ حالیت آتا جاچ الیسہ کرون و پوسکنا تہذیب آتیان درستی راستی مریسہ اوفتا جواننگا گڑاتے بخیر اٹ پارون. اگہ دن کرین تو سمجھا نن روایتی معاشرہ غان پیش تمون ….. ولدا عبوری معاشرہ نا گڑتی ہم داخس سخت مفرو بیرہ جدید معاشرہ نا تغ نا تعبیر نا جت پت مرو.

Facebook Comments
(Visited 12 times, 1 visits today)

متعلق سعید نور

سعید نور
نوجوان سعید نور بنیادی طور پر براہوی میں لکھتے اور پڑھتے ہیں۔ وہ براہوی کا ایک ادبی ہفت روزہ بھی "پڑوٗ کے نام سے چھاپتے ہیں۔