مرکزی صفحہ / بلوچی / سال 2017 ءِ لبزانکی نوبل داد پہ گدار نبیس کازو ؤایشی گورو ءَ

سال 2017 ءِ لبزانکی نوبل داد پہ گدار نبیس کازو ؤایشی گورو ءَ

چندن ساچ

سائنس ءُ سیاست ءِ پڑاں ہوار ہرسال لبزانک ءِ نوبل داد ہم دئیگ بیت۔ نوبل داد ءِ سرا ایراد گروکانی تہا بازیں مردمانی گشگ انت کہ اے داد چہ بندات ءَ سیاسی بنیاد ءَ دئیگ بوہان ءُ آیان انت۔ اے گپ وتی جاہ ءَ بَلے نوبل داد ءِ یک جوانی یے اے ہم ہست کہ آ ادیب ءَ سرجمیں دنیا ءَ نامدار کنت ءُ گڑا آئی ءِ کتابانی شوہازگ ءَ بازیں لبزانکی دیوانگ در کپنت۔ نوبل داد گرئگ ءَ پد ہما ادیب ءِ نبشتگیں چیزانی دنیا ءِ اے دگہ زباناں ہم رجانک کنئگ بندات بیت۔ چشکہ گارسیا مارکیز بوتگ آ نوبل داد گرئگ ءَ چہ پیسر کس ءَ نہ زانتگ ءُ بلکیں وہدے آ وتی گدار ایوکی ءِ سد سال ءَ نبشتہ کنئگ ءَ بیت ہمے وہد ءَ آ وتی دوست ءَ گشیت اگاں اے گدار ءِ نبشتہ کنئگ ءَ من بے سوب بوتاں گڑا وتی جند ءَ کشاں۔ بَلے وہدے آ نوبل داد ءَ گپیت گڑا مردم آئی ءِ شوہاز ءَ در کپنت۔

رند ءَ مردم اِدا کاینت ءُ سر بنت کہ مارکیز ءِ ایوکی ءِ سد سال ءَ چہ پیسر نبشتگیں گدار وشتر انت۔ گڈسر ءَ مارکیز ہم ہمے گپ ءِ جنئگ ءَ لاچار بیت کہ نوں پہ من نبشتہ کنئگ گرانیں کارے جوڑ بوتگ۔ پرچا کہ نوں سرجمیں دنیا ءِ چم منی سرا ایر انت کہ مارکیز چے نبشتہ کنت۔ اے نوبل داد ات کہ مارکیز ئِے مئے وڑیں مردمانی گورا آورت ءُ سر کُت۔ دنیا ءَ چشیں بازیں نبشتہ کار ہست انت کہ آ مزن ءُ ٹوہیں نبشتہ کار انت بَلے آیانی نبشتگیں چیز ءُ آیانی نام مئے دیما نہ گوستگ انت۔ اگاں آیاں نوبل بہ رستیں بلکیں مئے دنیا ءَ ہم سر بوتگ اتاں۔ بے شک چشیں بازیں گدار نبیس ہست آیاں نوبل داد نہ گپتگ ءُ مئے گورا سر بوتگ انت۔ اے آیانی ازم ءِ کمال انت۔ چشکہ ہاروکی موراکامی، کاؤلو پاؤلو، ایشار کمال، اویا بیدر، میلان کنڈیرا ءُ دگہ بازیں نام انت۔

اے سال ءَ بزانکہ سال 2017 ءَ لبزانک ءِ نوبل داد کازو ؤایشی گورو ءَ دئیگ بوتگ۔ کازوؤایشی گورو 8 نومبر 1954 ءَ ماں جاپان ءَ ودی بوتگ۔ آ وہدے 5 سال ءِ عمر ءِ بوت گڑا آئی ءِ کہول ءَ چہ جاپان ءَ لڈ ءُ بار کت ءُ دیم پہ برطانیہ ءَ شُت۔

سویڈن ءِ بن شہر ءَ نوبل کمیٹی ءِ جارانک ءِ ردا کازوؤایشی گورو ءِ ہشت گدار شنگ بوتگ کہ آ انسانی مارشتانی کش ءُ گوراں گردنت۔ بَلے کُجام مارشت؟ ہما مارشت اودا ایوکی ءِ دنیا انت۔ پرچا کہ انسان تہنا بیت گڑا آ باز جیڑیت۔ ہمے جیڑگانی دنیا ءِ وتی یک جتائیں رنگے کہ آ رنگ کازوؤایشی گورو ءَ وتی ازم ءِ دنیا ءَ آورتگ ءُ وانوکاں سر کتگ۔ آئی ءِ نامدار تریں گدار دا ریمینز آف دا ڈے ءُ نیور لیٹ می گو انت۔ اے دوئیں گدارانی سرا تامر ہم جوڑ کنئگ بوتگ کہ آ جوانیں وڑے ءَ چارگ ءُ دوست دارگ بوتگ انت۔

اے ہم زانگ بہ بیت کہ نوبل داد ءِ واستا ایوکا یک نامے دیما نئیت بلکیں یکے ءَ چہ گیش نام دیما کیت ءُ آیانی تہا بس یکے گچین کنئگ بیت۔ کازوؤایشی گورو ءِ ہمراہی ءَ کینیا ءِ نبشتہ کار نگو گی واتھیو نگو ءُ ہاروکی موراکامی ءِ نام ہم گرئگ بوتگ۔

ہاروکی موراکی جاپانی ادیبے کہ مروچی باندا آ سرجمیں دنیا ءَ جوانیں وڑے ءَ وانگ بوہگ ءَ انت۔ آئی ءِ نبشتگیں چیزانی وتی یک دنیایے کہ آ وتی وانوک ءَ انچیں دنیایے بارت کہ اودا وانوک کافکا ءُ بورخیس ءِ رنگ ءَ ہم گندیت۔ نگو گی واتھیو نگو ءِ باروا گشئگ بیت کہ آ وتی سیاسی دروشم ءَ نبشتہ کتگیں چیزانی سبب ءَ دنیا ءِ دیما نامدار انت ءُ ہمے سبب انت کہ آئی ءَ وتی ملک یلہ داتگ ءُ شتگ ءُ امریکا ءَ نشتگ۔

Facebook Comments
(Visited 19 times, 1 visits today)

متعلق چندن ساچ

چندن ساچ
چندن ساچ نہ صرف بلوچی نثر کے اچھے لکھاریوں میں شمار ہوتے ہیں بلکہ ایک سنجیدہ شاعر بھی ہیں۔