مرکزی صفحہ / بلوچی / منءَزِندےدَرکاراِنت
http://www.dreamstime.com/stock-photography-image23473822

منءَزِندےدَرکاراِنت

بالاچ قادر

اولیءَ بگر داں پنچُمیَ تبکءَ میتگءِ تَگرد بستگیں وانگجاہءَ کجام بے دزرسیءَ گوں وَنت……… وھدے نیمروچءَ گسءَواتر بوتاں تہ ماتءَ پتءِ نان پیسرا چادرءِ لمبءَ بستگ اَت ءُ گیگ اَت………!

لوگءِ پیتیانی پُشتءَ کتاب چگل دات اَنت. کاپی کیسگءَ کُتءُ چادرءِ لمبءَ بستگیں گرنچ بڈءَ جَت دیم پہ جنگلءَ…….

روچءِ کریاب کنوکیں برانزانی دیمپانی کنانءَ جنگلءِ لاپءَ اے نیمگءُ آنیمگءَ پتءَرا دَر گِپت ءُپدا ما ھور نشتءُ نان وارت……………. چوناھا برے برے من سرجمیں نیمروچءَ جنگل گول اِت پت درگپت نہ کُت،داں کہ بیگاہ بیتگ اَت…………. ھمے وڈ زندگیءِ پنچیں سال سہبءَ اسکولءُ بیگاہءَ جنگلءَ پتءِ ھمراھیءَ کہیرانی ساھگءَ گوازینت اَنت.ــــــــــــــــ!

پنچُمی تبکءَ پاس کنگءَپد منا شہرءِ مزنیں وانگجاہءَ رؤگ لوٹ ات پرچہ کہ میتگءَ چشیں وانگجاہ نیست اَت…………. شہر پہ من وابےاَت. وھدے اولی روچءَ من کلاسءَ نشتگ اتاں کہ اُستادءَ درستانی نامءُ جاگہانی نام جست کُت اَنت، وھدے من وتی میتگءِ نام گشت تہ اُستادءَ ابید چہ وھد جنگءَ منا ھمے گپ جت انت ءُ دَر کُت کہ "کؤرءَ آدستءِ میتگانی نودر ادا میا اَنت. مئے کلاس وَت پُرانت”.

ھیر بازیں روچءِ بے تامیءَپد نی من کلاسءَ چہ کشگ نہ بُوتاں……….. بانگواہءَ وھدے میتگءِ ذکرانہءَ ناکُو بیگ مھمدءَ ذکر بندات کُت من ھم پاداتکاں، جان شُودگءُ گُٹے چاہ ورگءَپد دیم پہ شہرءِ وانگجاہءَ رہادگ بُوتاں، اے وھدءَ کہ من کتاب زرت اَنتءُ درکپتاں میتگءِ بازیں مردُمے انگت واب اَت.!

میتگءِ پُشتءِ نیمگءِ کوہءِ کنڈگءَ چہ سرکپگءُ دو کلاکءِ کشکءِ ھلاس کنگءَ پَد وانگجاہءَ سر بُوتاں ءُ پدا چھٹیءَ پد برے سئے بجءَ ءُ برے چار بجءَ گِسءَ واتر کُت……..!!

اسلءَ من وتی زندگیءَ وانگجاہءَ ناں بداخلاقیءُ ناں کپ سبق یاد نہ بئیگءِ سببءَ لٹ وارتگ اَت بلکیں زمستانءِ موسمءَوھدے سک سرد بیت گُڈا من اسکولءَ کمو لیٹ سربیتاں پمیشکا واجہ الیاسءَ ھر روچ منی برپ بستگیں دستانی دلءَ شش شش لٹ جتگ اَت………….!!

سپر ھمے وڈ جُنزان اَت……… میتگءَ بگر داں کہ شہرءَ منی تراولیں پاداں کشکے جوڈ کُتگ اَت،اے کوہ،کوہءِ بُنءِ کبرستان،ناکو شکرءِ ڈگار ءُ گؤرگیءِ کؤرءِ سنگ چہ منا آشنا اِتاں………….!

ھمےوڈ اے وانگجاہءَ ھم من وتی زندگیءِ پنچ سال گوازینت…..گرم،تپتگیں ریک،برپیں زمستانءُ دگہ باریں چے چے دیست بلئے اسکول یل ندات…….چونیں مھرے ھست اَت منیءُ کتابانی میانءَ.ــــــــــ

پدا اےوڈ بُوت کہ ھمے وانگجاہءَ چہ منی نام کشگ بوتءُ چکاس ءَ نہ اشت اِت گُڈا من لاچار بُوتءُ میٹرکءِ چکاس پرائیوٹ دات…..اسلءَ گش انت کہ دلءِ نیمون باز انت ھمے وڈ من ھم جنگلءِ بے ساھگیں کہیرانی چیرءَ نشتگ ءُ ڈاکٹریءِ واب دیستگ اَت بلئے پرائیوٹ چکاس دئیگءَپد منی ڈاکٹریءِ ارمان جنگلءِ مانشانتگیں گواتءَ چو مرگی چُنکیانی کدوہءَ بال دات اَنت…………

پدا باریں دلءَ چے چے ارمان اتاں کہ ھشکیں واب بُوت اَنت……..پی سی ایس،سی ایس ایس،ءُ دگہ باز ـــــــــــــــــــ

من بزانتیں کہ اے ارمان دراہ ھشکیں واب بنت وَ من ھماروچی وتیءُ جنگلءِ سیادی نہ سستگ اَت…………من بِزانتیں اے تراولیں پادانی مُز منا رست نہ کنت وَ من پت تہنا یل نداتگ اَت……….

اے منی میٹرکءِ سرٹیفکیٹءُ کاگد اَنت کہ تنیگتءَ ھزار رندءَ سرکاری کارگسانی ٹیبلانی سرا کپتگ ءُ چست بوتگ اَنت بلئے ھچ……. اے کاگداں تنیگتءَ باریں چنچو دپترانی اندرءَ وتءَ پیش داشتگ بلئے ھچ…………!!

چناھا پتءَ مُدام گشتگ اَت کہ بوانءَ شریں نوکری یے بگر بلئے من ھروھدءَپتءِ کرا ھمے گپ جتگ اَت کہ "ابا…..زانتکارےءَ گشتگ کہ آ چاگردءَ کہ مردم تہنا نوکری کنگءِ واستءَ وان اَنت، آ چگردءَ جوانیں انسان نہ بلکیں تہنا نوکر پیداگ بنت”

منا مرچی وتی ھمے گپءِ سرا کندگ پیداک اِنت، ھمے مارگءَآں کہ اے زانتکارءَ دروگ بستگ……..نوکری اولی لوٹ انت انسانءِ……..

زندءِ دہ سال ببا دات پہ کتاباں بلئے منا زندگی یے دست نہ کپت………..

دل گشیت ھمے کاگداں دستءَ کن، مزنیں دگےءِ سرا بوشتءُ چیہال بہ جنءُ بہ گُش کہ مَردماں،او مردماں…….او ھُداءِ مھراونیں انساناں………. منا زندے درکار انت!!

شپءِ2 بجءُ21 مِلٹ ـــــــــــــــــــــ
19,09,2017

Facebook Comments
(Visited 47 times, 1 visits today)

متعلق بالاچ قادر

بالاچ قادر
بالاچ قادر نوجوان طالب علم ہیں۔ گوادر سے تعلق رکھتے ہیں۔ سماجی موضوعات پہ بلاگ لکھنے میں دلچسپی رکھتے ہیں۔ balachqadir23@gmail.com